گوجرانوالہ: (ویب ڈیسک) گوجرانوالہ میں سفاک ملزم نے شادی سے انکار پر خاتون کی دونوں ٹانگیں کاٹ دیں۔
پنجاب کے ضلع گوجرانوالہ کے علاقے مختارکالونی میں ایک دلخراش واقعہ پیش آیا جہاں سفاک ملزم نے شادی سے انکار پر خاتون کی دونوں ٹانگیں کاٹ ڈالیں اور فرار ہو گیا۔
پولیس کے مطابق واقعے کا مقدمہ درج کرلیا گیا ہے تاہم خاتون نے پولیس کو 15 روز کے بعد اطلاع دی جس کے بعد کارروائی کرتے ہوئے ایک ملزم کو گرفتار کرلیا ہے اور مرکزی ملزم تاحال مفرور ہے۔
پولیس حکام کے مطابق خاتون نے بتایا کہ جاوید نامی شخص متاثرہ خاتون سے شادی کرنا چاہتا تھا اور مسلسل اصرار کررہا تھا، تاہم خاتون اور اس کے گھر والے اس رشتے پر راضی نہیں تھے۔
حکام نے بتایا کہ ملزم جاوید نے خاتون کو بہانے سے اپنے گھر بلایا اور ایک بار پھر اسے شادی کی پیشکش کی جس پر خاتون نے انکار کردیا تو ملزم نے مشتعل ہوکر تیز دھار آلے سے اس کی دونوں ٹانگیں کاٹ دیں۔
متاثرہ خاتون نے سیٹلائٹ ٹاؤن تھانے میں درخواست دائر کی ہے اور مرکزی ملزم جاوید کو نامزد کیا ہے، ملزم تاحال فرار ہے اور اس کی گرفتاری کے لئے ٹیمیں تشکیل دے دی گئی ہیں۔
