لاہور: (ویب ڈیسک) اداکارہ وماڈل رزکمالی نے کہا ہے کہ ٹی وی کی طرح سینما سکرین پر بھی مختلف کردار نبھانا پسند ہیں۔
رزکمالی کہتی ہیں کہ پاکستان میں اب اچھی اورمعیاری فلمیں بننے لگی ہیں اسی لیے فیشن اور ٹی وی کے نامور اسٹارز بھی یہاں کام کرنے کو ترجیح دے رہے ہیں ماضی میں بننے والی فلموں میں روایتی ہیرو اور ہیروئن کے مخصوص کردار ہی ہوا کرتے تھے جس میں ہیروئن کا کردار چند گانوں اور ہیرو کو منانے تک محدود ہوا کرتا تھا، مگر اب ایسا نہیں ہے۔
رزکمالی نے کہا کہ اس وقت کامیڈی، میوزیکل، رومانٹک، ایکشن اور تھرل سمیت ہر مزاج کی فلمیں بن رہی ہیں، اسی لیے سلورسکرین پرکام کرنے کا فیصلہ کیا ہے۔ کچھ فلموں میں کام کی آفرز ہو چکی ہیں لیکن جاندار کردار نہ ہونے کی وجہ سے انھیں سائن نہیں کیا۔ انہوں نے کہا کہ انکے لیے خوشی کی بات یہ ہے کہ فلمی کیرئیر کا آغاز پاکستانی فلم کے ذریعے ہی کررہی ہیں جس کی شوٹنگ پاکستان اور برطانیہ سمیت دیگر یورپی ممالک میں کی جائے گی۔ یہ فلم کامیڈی اور میوزیکل ہوگی اس میں میرا کردار ایک چنچل لڑکی کا ہے۔
آئٹم سانگ کے سوال پر اداکارہ کا کہنا تھا کہ کافی آفرز ہوئیں مگر ایک ہی جواب دیا کہ جب تک بطور ہیروئن تین چار فلمیں نہ کرلوں اس وقت تک ایسا ممکن نہیں ہے ۔ رزکمالی نے کہا کہ ٹی وی ڈراموں کی طرح پردہ سکرین پر بھی مختلف کردار کرنا ہی پسند کروں گی۔ اداکارہ نے کہا کہ ٹی وی کے ساتھ فلم انڈسٹری جس تیزی سے آگے بڑھ رہی ہے اس کے ذریعے پاکستانی بین الاقوامی سطح پراپنے کلچراورسوفٹ امیج کو پروموٹ کرسکتے ہیں۔
