کراچی: (روزنامہ دنیا) پاکستانی اداکار میکال ذوالفقار نے بھارتیوں کا پول کھولتے ہوئے کہا کہ بھارت ہمیشہ پاکستانی فنکاروں کا منفی اور غلط استعمال کرتا ہے، ہمسایہ ملک میں وہ عزت بھی نہیں دی جاتی جس کے فنکار حقدار ہوتے ہیں۔
پاکستان شوبز انڈسٹری کے صف اول کے اداکار میکال ذوالفقار نے حال ہی میں اپنے بھارت میں کام کرنے کا تجربہ بیان کرتے ہوئے کہا کہ بھارتی پہلے پاکستانی فنکاروں کا منفی اور غلط استعمال کرتے ہیں اور پھر انہیں آلہ کار بناکر مشکلات میں اکیلا چھوڑ دیتے ہیں۔
میکال ذوالفقار نے کہا جب میں نے فلم ‘‘بے بی’’ سائن کی اس وقت میں نے خصوصی طور پر پوچھاتھا کہ کیا یہ فلم اسلام اور پاکستان مخالف ہے تب فلم میکرز نے کہا نہیں بلکہ فلم میں ایسا کچھ بھی نہیں ہے۔
فلم کے پہلے حصے میں، مَیں نہیں تھا مجھے فلم کے سکرپٹ سے متعلق کوئی اندازہ نہیں تھا تاہم جب فلم ریلیز ہوئی تب مجھے حقیقت کا علم ہوا، اس کے بعد میں نے فیصلہ کیا کہ میں صرف پاکستانی فلموں میں کام کروں گا اس کے علاوہ ہمیں بھارت میں وہ عزت بھی نہیں دی جاتی جس کے ہم حقدار ہیں۔
