لاہور: (ویب ڈیسک) پاکستان کی صف اول کی اداکارہ ماہرہ خان اور ہمایوں سعید کی نئی فلم ’’لَو گُرو‘‘ کی ریلیز کی تاریخ کا اعلان کر دیا گیا۔
شوبز انڈسٹری کی صف اول کی اداکارہ ماہرہ خان اور سپر سٹار ہمایوں سعید کی جوڑی کو ایک ساتھ بے حد پسند کیا جاتا ہے، بن روئے ڈرامے اور اس کے فلمی حصے کے بعد اس جوڑی نے مداحوں کے دلوں میں گھر کرلیا اور آج بھی مداح انہیں ایک ساتھ دیکھنے کیلئے بے قرار ہیں۔
تاہم اب ان مداحوں کا انتظار ختم ہوا کیونکہ جلد یہ خوبصورت جوڑی ایک ساتھ بڑی سکرین پر جلوہ گر ہوگی، ماہرہ خان نے فلم کا پوسٹر جاری کرتے ہوئے اس کی ریلیز کی تاریخ کا بھی اعلان کیا ہے، رومانوی کہانی پر مبنی فلم ’لَو گُرو‘ رواں سال عیدالاضحیٰ کے موقع پر ریلیز کی جائے گی، اس فلم کی ہدایتکاری معروف فلمساز ندیم بیگ نے کی ہے۔
شوبز انڈسٹری کی لیجنڈ جوڑی نے اپنی اس فلم کی عکسبندی پاکستان کے مختلف مقامات سمیت برطانیہ میں کی ہے، تاہم اس فلم کی سٹوری کیا ہے یہ اس کا ٹریلر سامنے آنے کے بعد ہی معلوم ہوسکے گا۔
