نئی دہلی: (ویب ڈسیک) بھارتی شوبز انڈسٹری کے ابھرتے ہوئے گلوکار ہیومنے ساگر صرف 36 سال کی عمر میں اپنے مداحوں کو افسردہ چھوڑ گئے۔
بھارتی میڈیا کے مطابق میوزک سٹار ہیومنے ساگر کا جگر ناکارہ ہوچکا تھا جس سے ان کے دیگر اعضا کو بھی شدید نقصان پہنچ رہا تھا اور وہ تیزی سے کمزوری اور نقاہت کا شکار تھے۔
آنجہانی گلوکار کے اہل خانہ نے بتایا کہ ان کو 3 دن قبل طبیعت بگڑنے پر ہسپتال کے انتہائی نگہداشت کے وارڈ میں داخل کروایا گیا تھا، ہیومنے کا نمونیا بگڑ گیا تھا جبکہ وہ پہلے ہی جگر کے دائمی مرض میں مبتلا تھے، ماہر ڈاکٹرز کی ٹیم نے ان کا علاج کیا لیکن وہ جانبر نہ ہوسکے۔
گلوکار کے اچانک انتقال پر اوڈیشہ کے وزیراعلیٰ سمیت سیاسی رہنماؤں اور ان کے مداحوں نے دلی تعزیت کی، ہیومنے ساگر نے آبائی ریاست اوڈیشہ کے مقبول ٹی وی میوزیکل مقابلے میں کامیابی حاصل کرکے بھارت بھر میں توجہ حاصل کی تھی، اس کے بعد ان کی کامیابی کا سفر شروع ہوا اور وہ ٹی وی سے ہوتے ہوئے فلموں کیلئے گانے لگے تھے۔
