اسلام آباد:(دنیا نیوز) پاکستان نرسنگ کونسل کی مکمل ڈیجیٹلائزیشن کا فیصلہ کرلیا گیا۔
وفاقی وزیرِ صحت مصطفیٰ کمال کی صدارت میں پاکستان نرسنگ کونسل سے متعلق اہم اجلاس ہوا جس میں وفاقی سیکرٹری صحت ایڈیشنل سیکرٹری بھی موجود ہیں، اجلاس میں پاکستان نرسنگ کونسل کی مکمل ڈیجیٹلائزیشن کے حوالے سے اہم فیصلے کیے گئے۔
مصطفیٰ کمال کا اجلاس کے شرکا سے خطاب کرتے ہوئے کہنا تھا کہ کونسل کے تمام امور کو جلد از جلد کمپیوٹرائزڈ کیا جائے، انسانی مداخلت کم سے کم کر کے میرٹ اور شفافیت کو یقینی بنایا جائے۔
اُنہوں نے کہا کہ ہم نرسنگ کے شعبے میں کھوئی ہوئی ساکھ کو بحال کریں گے،پاکستان نرسنگ کونسل کو ایک جدید، مؤثر اور بین الاقوامی معیار کی ادارہ بنائیں گے، نرسنگ کا شعبہ صحت کے شعبے میں بڑی اہمیت کا حامل ہے۔
وفاقی وزیر صحت کا کہنا تھا کہ پاکستان میں نو لاکھ نرسز کی کمی کا سامنا ہے، دنیا بھر میں اس وقت تقریباً 25 لاکھ کوالیفائیڈ نرسز کی کمی ہے،نرسنگ کے شعبے کو مضبوط بنانے کیلیے مربوط اور موثر اقدامات کو یقینی بنایں گے۔
مصطفیٰ کمال نے مزید کہا کہ نرسنگ کے شعبے کو جدید خطوط پر اُستوار کریں گے ، نرسنگ کے شعبے کی بہتری کیلیے اصلاحات کا سلسلہ جاری ہے۔
