اسلام آباد: (دنیا نیوز) قائد اعظم یونیورسٹی میں دو طلباء گروہوں میں تصادم ہو گیا جس کے نتیجے میں درجن سے زائد طلباء زخمی ہو گئے ہیں۔ زخمیوں کو پولی کلینک ہسپتال منتقل کر دیا گیا ہے۔ طلباء نے جھگڑا ختم کرانے کی کوششوں میں مصروف پولیس اہلکاروں پر پتھراؤ شروع کر دیا تو صورتحال قابو سے باہر ہوتی نظر آنے لگی۔ لہٰذا انتطامیہ کی جانب سے پولیس اور رینجرز کی اضافی نفری کو یونیورسٹی طلب کر لیا گیا جہاں صورتحال کافی دیر تک کشیدہ رہی۔ جس کے بعد یونیورسٹی انتظامیہ اور پولیس نے طلباء کو فوری طور پر تمام ہاسٹلز خالی کرنے کا حکم دیا۔ یونیورسٹی انتظامیہ کے مطابق، یونیورسٹی اور ہاسٹلز ایک ہفتے تک بند رہیں گے۔
 دوسری جانب طلباء نے ہاسٹلز خالی کرنے سے انکار کر دیا تو پولیس کی جانب سے طلباء کو ہاسٹلز خالی کرنے کیلئے بیس منٹ کا الٹی میٹم دیا گیا  اور کہا گیا کہ ہاسٹلز خالی نہ کئے گئے تو کارروائی کریں گے۔