اسلام آباد: (دنیا نیوز) وزیراعظم عمران خان کی زیر صدارت وفاقی کابینہ کا اجلاس جاری ہے جس میں 15 نکاتی ایجنڈے پر غور ہوگا۔
وفاقی کابینہ اجلاس میں ملک کی مجموعی سیاسی و معاشی صورتحال کا جائزہ لیا جائے گا، کابینہ مریم نواز کے نام ای سی ایل سے نکالنے سے متعلق ذیلی کمیٹی کی سفارشات پر فیصلہ کرے گی، ادویات کی زیادہ سے زیادہ قیمت فروخت کے تعین کی منظوری بھی ایجنڈے میں شامل ہے۔
کابینہ اقتصادی رابطہ کمیٹی کے اجلاس کے فیصلوں کی توثیق کرے گی، فیڈرل لینڈ کمیشن کے سینئر ممبر کی تعیناتی کی منظوری بھی ایجنڈے میں شامل ہے، فرسٹ ویمن بینک اور ایگزیم بینک کے سی ای اوز کی تعیناتی کی منظوری دی جائے گی۔ پاکستان سپورٹس بورڈ کی ایگزیکٹو کمیٹی، بورڈ کی تشکیل نو اور قانون میں ترمیم کا معاملہ ایجنڈے میں شامل ہے۔
نیشنل کمیشن فار ہیومن رائٹس کی چیئرپرسن اور اراکین کی تقرری کی منظوری بھی ایجنڈے کا حصہ ہے، ایل او سی کے قریب بسنے والے عوام کیلئے بی آئی ایس پی کے تحت خصوصی ریلیف گرانٹ کی منظوری ایجنڈے میں شامل ہے، کراچی پورٹ ٹرسٹ کے جی ایم آپریشنز کی پاک بحریہ سے ڈیپوٹیشن کا معاملہ بھی زیر غور آئے گا، نیشنل پاور پارک مینجمنٹ آف کمپنیز کے بورڈ آف ڈائریکٹرز کی تشکیل بھی ایجنڈے کا حصہ ہے۔
