اسلام آباد: (دنیا نیوز) وفاقی حکومت نے 10 مارچ بروز پیر سے ملک کے معمر افراد کیلئے عالمی وبا سے بچنے کیلئے ویکسی نیشن شروع کرنے کا اعلان کر دیا ہے۔
یہ بات وفاقی وزیر برائے منصوبہ بندی اور نیشنل کمانڈ اینڈ آپریشن سینٹر کے سربراہ اسد عمر نے سماجی رابطوں کی ویب سائٹ ٹویٹر کے ذریعے بتائی۔
اسد عمر کا کہنا تھا کہ ملک میں بزرگ افراد کو کورونا وائرس کی ویکسین دینے کا عمل 10 مارچ سے شروع کر دیا جائے گا۔
وفاقی وزیر کا کہنا تھا کہ زیادہ بزرگ افراد کو وبائی مرض سے بچاؤ کے ٹیکے پہلے لگائے جائیں گے۔ اس سلسلے میں مزید تفصیلات بھی کل جاری کی جائیں گی۔
The vaccination of people 60 years and older will be starting from Wednesday the 10th of March. Vaccinations will be done in reverse order by age. Which means the oldest person who has registered will be vaccinated first. Full details will be issued tomorrow.
— Asad Umar (@Asad_Umar) March 7, 2021
خیال رہے کہ پاکستان میں کورونا وائرس کی دوسری لہر جاری ہے۔ این سی او سی کے اعدادوشمار کے مطابق پاکستان میں گزشتہ چوبیس گھنٹوں کے دوران کورونا وائرس کے مزید 1 ہزار 780 کیسز سامنے آئے ہیں۔
اعدادوشمار کے مطابق مزید 39 افراد اس موذی وبا سے زندگی کی بازی ہار گئے۔ اس حالیہ اضافے سے ملک بھر میں کورونا وائرس سے انتقال کرنے والوں کی مجموعی تعداد 13 ہزار 205 ہو گئی ہے۔
