اسلام آباد: (دنیا نیوز) اپوزیشن لیڈر عمر ایوب نے کہا ہے کہ حکومت نے معیشت تباہ کر دی ہے، کئی اعداد و شمار مصنوعی طور پر بڑھائے۔
اپنے چیمبر میں میڈیا سے گفتگو ہوئے عمر ایوب نے کہا کہ آئندہ مالی سال بھی گروتھ ریٹ نیچے جائے گی، ملکی تاریخ میں کم ترین سرمایہ کاری ہوئی ہے، زراعت سے متعلق حکومتی دعوے غلط ہیں، گندم کی فصل تباہ ہوگئی لوگ بیچ نہیں پا رہے، بمپر کراپ حکومت اور کسانوں کو فائدہ نہیں دے رہی۔
عمر ایوب نے کہا کہ اب چاول کا بھی بحران آئے گا، ایران سے پٹرول سمگلنگ کی جگہ چاول سمگل ہوگا، انہوں نے کہا کہ افراط زر میں کمی نہیں آئی مزید بڑھی ہے، عالمی مارکیٹ میں تیل کی قیمتیں کم ہوئیں مگر عوام کوفائدہ نہیں مل رہا۔
اپوزیشن لیڈر نے کہا کہ حکومت نے ڈالر کو مصنوعی طور پر 275 پر رکھا ہوا ہے، اشیائے ضروریہ مزید مہنگی ہوں گی، حکومت نے درآمدات کو محدود رکھا ہے جس سے بجلی کا بحران ہے، لوڈشیڈنگ بجلی چوری کی وجہ سے نہیں بجلی پیدا نہ کرنے کی وجہ سے ہو رہی ہے۔
عمر ایوب کا کہنا تھا کہ حکومت وقت کی فرعون ہے، پنجاب میں ہتک عزت قانون کی شدید مذمت کرتے ہیں، پنجاب میں ہتک عزت قانون آزادی صحافت کیلئے زہر قاتل ہے، سوشل میڈیا پر فائر والز لگا کر آزادی صحافت کو روک رہے ہیں۔
