پشاور: (عامر جمیل) خیبرپختونخوا کے ضلع کرم میں قیام امن کے لئے فریقین کا دوسرا جرگہ آج پشاور میں ہوگا۔
ذرائع کے مطابق جرگے میں دونوں فریقین شرکت کریں گے، جرگے کے دوسرے دور میں قیام امن پر تفصیلی بات چیت اور عمائدین کو قریب لانے کی کوشش ہو گی۔
یاد رہے کہ گزشتہ روز فریقین کے مابین اسلام آباد میں اہم بیٹھک ہوئی تھی، اسلام آباد میں منعقد جرگے میں سوشل میڈیا اور امن و امان پر بات ہوئی تھی۔
ممبر ضلع کرم سید رضا حسین کے مطابق جرگہ میں سوشل میڈیا کے غلط استعمال کی روک تھام سمیت قیام امن کے لئے ضروری اقدامات پر بات چیت ہوئی، دونوں فریقین کے عمائدین کے جرگے کی دوسری نشست پشاور میں ہوگی۔
انہوں نے مزید کہا کہ عوام امن کے لئے ترس رہے ہیں اور قیام امن چاہتے ہیں، طویل بدامنی کے دوران پہلی بار عمائدین آپس میں بیٹھے، گلے شکوے کئے۔
ممبر سجاد سید میاں کا کہنا تھا کہ قیام امن کے لئے عمائدین کو قریب لانے کی کوشش کی ہے، فریقین کے درمیان اچھے ماحول میں بات چیت ہوئی ہے۔
ایک اور ممبر ولی سید میاں نے کہا ہے کہ جرگے میں ایک دوسرے کے حقوق کا خیال رکھنے پر اتفاق کیا گیا، فریقین ایک دوسرے کے مقدس مقامات کا احترام کریں گے۔
