روس کے ساتھ تعلقات مزید مضبوط بنانے کے خواہاں ہیں: وزیراعظم

اسلام آباد: (دنیا نیوز) وزیراعظم شہباز شریف نے کہا ہے کہ پاکستان روس کے ساتھ تعلقات مزید مضبوط بنانے کا خواہاں ہے۔

روس کے اول نائب وزیر برائے توانائی پاول سوروکن ( Mr Pavel Sorokin) نے 6 رکنی وفد کے ساتھ وزیراعظم محمد شہباز شریف سے ملاقات کی۔

ملاقات کے دوران وزیراعظم شہباز شریف نے کہا کہ ہم روس کے ساتھ سفارتی، تجارتی اور سرمایہ کاری کے روابط کو مزید بڑھانے کے خواہاں ہیں، روس کے صدر ولادی میر پوتن سے آستانہ میں شنگھائی تعاون تنظیم سربراہی اجلاس کے موقع پر ہونے والی ملاقات نہایت مفید رہی۔

شہباز شریف نے روسی صدر کو دورۂ پاکستان کی دعوت کا اعادہ کرتے ہوئے کہا کہ پاکستان اور روس کے درمیان توانائی اور دیگر شعبوں میں تعاون کی بے پناہ استعداد موجود ہے۔

روسی اول نائب وزیر توانائی نے توانائی نے شاندار میزبانی پر حکومت پاکستان کا شکریہ ادا کیا اور کہا کہ روس پاکستان کے ساتھ توانائی کے شعبے میں تعاون بڑھانے کا خواہاں ہے،

یہ بھی پڑھیں: وزیراعظم سے نئے کابینہ ارکان کی ملاقات، معاشی و سیاسی صورتحال پر گفتگو

ملاقات میں نائب وزیراعظم و وزیر خارجہ اسحاق ڈار، وفاقی وزیر اقتصادی امور احد خان چیمہ، وفاقی وزیر پٹرولیم مصدق ملک، وفاقی وزیر اطلاعات و نشریات عطاء اللہ تارڑ ، وفاقی وزیر پاور ڈویژن اویس احمد لغاری موجود تھے۔

وفاقی وزیر علی پرویز ملک، وزیراعظم کے مشیر محمد علی ، وزیراعظم کے معاون خصوصی طارق فاطمی، گورنر اسٹیٹ بینک آف پاکستان جمیل احمد اور متعلقہ اعلیٰ سرکاری افسران بھی اس موقع پر موجود تھے۔