پاک فوج دہشتگردی کیخلاف سیسہ پلائی دیوار، عوام کی حفاظت یقینی بنائیں گے: آرمی چیف

راولپنڈی: (دنیا نیوز) پاک فوج کے شعبہ تعلقات عامہ کے مطابق آرمی چیف جنرل سید عاصم منیر نے بنوں چھاؤنی پر خوارج کا حملہ ناکام بنانے کے بعد بنوں کا دورہ کیا۔

 آئی ایس پی آر کے مطابق آرمی چیف کو جاری آپریشنز، علاقے کی سکیورٹی صورتحال پر بریفنگ دی گئی، آرمی چیف نے سی ایم ایچ بنوں میں زخمی اہلکاروں کی عیادت کی۔

آرمی چیف نے فوجی جوانوں سے خطاب میں ان کی بہادرانہ کارروائیوں، غیر متزلزل عزم اور حوصلے کو سراہا، انہوں نے جوانوں کے بلند حوصلے اور ثابت قدمی کی ستائش کی۔

آئی ایس پی آر کے مطابق آرمی چیف جنرل سید عاصم منیر نے کہا کہ پاک فوج دہشت گردی کے خلاف سیسہ پلائی دیوار کے طور پر اپنی خدمات جاری رکھے گی، مسلح افواج عوام کی حفاظت یقینی بنانے میں کوئی کسر نہیں چھوڑیں گی۔

آرمی چیف کا کہنا تھا کہ دہشت گرد گروہ بشمول فتنہ الخوارج افغان سرزمین سے کارروائیاں جاری رکھے ہوئے ہیں، غیر ملکی ہتھیاروں کا استعمال واضح ثبوت ہے کہ افغانستان ایسے عناصر کیلئے محفوظ پناہ گاہ بنا ہوا ہے۔

آئی ایس پی آر کے مطابق آرمی چیف نے کہا کہ کسی بھی تنظیم کو پاکستان کے امن و استحکام کو خراب کرنے کی اجازت نہیں دی جائے گی۔

آرمی چیف جنرل سید عاصم منیر نے کہا کہ شہریوں بشمول بچوں، خواتین اور بزرگوں کو بہیمانہ طور نشانہ بنانا خوارج کے اصل عزائم کو ظاہر کرتا ہے، دہشت گردی کے خلاف جنگ میں قومی یکجہتی ضروری ہے۔

آرمی چیف نے بزدلانہ دہشت گرد حملے میں شہید شہریوں کے خاندانوں سے گہرے دکھ اور افسوس کا اظہار کیا اور کہا کہ واقعے میں ملوث ملزمان کو فوری طور پر جوانوں نے کیفر کردار تک پہنچایا تھا۔

پاک فوج کے شعبہ تعلقات عامہ کے مطابق آرمی چیف جنرل سید عاصم منیر نے کہا کہ حملے کے منصوبہ سازوں اور معاونین کو بھی جلد انصاف کے کٹہرے میں لایا جائے گا، بنوں آمد پر کور کمانڈر پشاور نے آرمی چیف کا استقبال کیا۔