اسلام آباد:(دنیا نیوز) سوشل میڈیا پر منفی پروپیگنڈا کے معاملہ پر چئیرمین تحریک انصاف بیرسٹر گوہر جے آئی ٹی کے سامنے پیش ہوگئے،اندرونی کہانی سامنے آگئی۔
ذرائع کے مطابق تحریک انصاف کے طلب کردہ افراد سے سوشل میڈیا ہینڈلر سے متعلق سوالات کیے گئے، پاک فوج اور ریاستی اداروں سے متعلق سوشل میڈیا پوسٹس پر سخت سوالات ہوئے، رہنماؤں کو سوشل میڈیا پر پوسٹس سے متعلق سب کچھ دکھایا گیا۔
باوثوق ذرائع نے بتایا کہ بیرسٹر گوہر و دیگر سے پارٹی فنانسنگ سے متعلق بھی سوالات پوچھے گئے جبکہ جے آئی ٹی نے پیش نہ ہونے والے افراد کے خلاف سخت ایکشن لینے کا فیصلہ کیا ہے۔
پی ٹی آئی کی جانب سے بیرسٹر گوہر، روف حسن اور شاہ فرمان اور تحریک انصاف کے فنانس ڈیپارٹمنٹ کے دو لوگ جے آئی ٹی کے سامنے پیش ہوئے، عالیہ حمزہ اور کنول شوذب کی جانب سے ان کے وکیل ڈاکٹر علی عمران جے آئی ٹی کے سامنے پیش ہوئے،دونوں کی آج کی مشروط حاضری قبول کر لی گئی۔
ذرائع نے یہ بھی بتایا کہ جے آئی ٹی نے ہدایت کہ ہےکہ آئندہ طلبی پر دونوں خواتین رہنما ہر صورت پیش ہوں جبکہ فنانس ٹیم نے تحریک انصاف کی فنڈنگ سے متعلق تمام ریکارڈ جے آئی ٹی کو پیش کر دیا، پیش ہونے والے تمام لوگوں سے انفرادی تحقیقات کی گئیں۔
بعد ازاں اپنی گفتگو میں بیرسٹر گوہر کا کہنا تھا کہ جے آئی ٹی نے ڈیڑھ گھنٹے تک پوچھ گچھ کی، ہم تمام اداروں کا احترام کرتے ہیں، کسی بھی ادارے کے ساتھ خلیج نہیں چاہتے، جے آئی ٹی کی جانب سے اٹھائے گئے سوالات پارٹی کے پلیٹ فارم پر ڈسکس کریں گے۔
انہوں نے مزید کہا کہ سوشل میڈیا سے متعلق سوالات پر بانی پی ٹی آئی سے بھی ڈسکس کریں گے۔
