پشاور: (دنیا نیوز) مشیر اطلاعات خیبرپختونخوا بیرسٹر ڈاکٹر سیف نے کہا ہے کہ دہشتگردی پر قابو پانے کیلئے افغانستان سے بات چیت کرنا ناگزیر ہے۔
اپنے ایک بیان میں بیرسٹر سیف کا کہنا تھا کہ وفاق نہ خود افغانستان سے بات کر رہا ہے اور نہ ہمیں بات کرنے دے رہا ہے، وفاق نے افغانستان سے بات چیت کیلئے طے شدہ ٹی او آرز سرد خانے میں ڈال دیئے ہیں۔
انہوں نے کہا کہ وفاق تماشا دیکھنے کے بجائے دہشتگردی کے خلاف ٹھوس حکمت عملی بنائے، خیبرپختونخوا کے عوام اور سکیورٹی فورسز قربانیاں دے رہے ہیں، دہشتگردی صرف کے پی کا نہیں پورے ملک کا مسئلہ ہے، دہشتگردی کے قومی مسئلے کے حل کیلئے قومی یکجہتی ضروری ہے۔
بیرسٹر سیف کا کہنا تھا کہ اندرونی و بیرونی سطح پر دہشتگردی روکنے کیلئے عملی اقدامات کئے جائیں، کے پی حکومت دہشتگردی کے بڑھتے ہوئے واقعات پر شدید تشویش کا اظہار کر رہی ہے۔
