پشاور: (دنیا نیوز) مشیر اطلاعات خیبرپختونخوا بیرسٹر ڈاکٹر سیف نے بلاول بھٹو کے بیان پر ردعمل دیتے ہوئے کہا کہ بلاول اپنے نانا کی برسی پر بھی عمران خان اور پی ٹی آئی پر تنقید سے باز نہ آئے۔
اپنے بیان میں بیرسٹر سیف کا کہنا تھا کہ بانی پی ٹی آئی 2018 میں اقتدارمیں آئے، دہشت گردی کا ناسور پچھلے کئی دہائیوں سے جاری ہیں، عمران خان کےدور حکومت میں دہشت گردی ختم ہو چکی تھی۔
انہوں نے کہا کہ بلاول وفاق میں جعلی حکومت کا برابر حصہ دار ہے اور دہشتگردی کے حوالے سے بلاول کی سنجیدگی کا یہ عالم ہے کہ بطور وزیر خارجہ افغانستان کا دورہ گوارا نہیں کیا۔
صوبائی مشیر اطلاعات کا مزید کہنا تھا کہ دہشت گردی کے خاتمے کیلئےافغانستان سے بات چیت ضروری ہے جو وفاقی حکومت نہیں کر رہی، وفاقی حکومت نہ ہمیں بات کرنے دیتی ہے نہ خود کرتی ہے۔
