اسلام آباد: (دنیا نیوز) وفاقی وزیرداخلہ محسن نقوی نے سائبر کرائمز کی روک تھام اور انسانی سمگلنگ میں ملوث مافیا کے خلاف ملک بھر میں موثر کریک ڈاؤن کا حکم دیدیا۔
وفاقی وزیر داخلہ محسن نقوی سے نئے تعینات ہونے والے ڈی جی ایف آئی اے رفعت مختار راجہ اور ڈائریکٹر جنرل نیشنل سائبر کرائم انویسٹیگیشن ایجنسی وقار الدین سید نے ملاقات کی۔ وزیر مملکت داخلہ طلال چوہدری اور وفاقی سیکرٹری داخلہ محمد خرم آغا بھی اس موقع پر موجود تھے۔
وزیر داخلہ نے ڈی جی ایف آئی اے کو غیر قانونی امیگریشن کے خلاف موثر حکمت عملی تیار کرنے کا ٹاسک بھی دیدیا۔
وزیرداخلہ محسن نقوی کا کہنا تھا کہ انسانی سمگلنگ روکنے کے لئے چاروں صوبوں میں بلا امتیاز کارروائی عمل میں لائی جائے، اس مافیا سے آہنی ہاتھوں سے نمٹا جائے۔
انہوں نے کہا کہ مکروہ دھندے میں ملوث لوگ معصوم لوگوں کی جانوں سے کھیل رہے ہیں، ایف آئی اے سمیت تمام قانون نافذ کرنے والے اداروں کو ملک سے غیر قانونی سپیکٹرم اور منظم جرائم کے خاتمے کیلئے ملکر کام کرنا ہو گا۔
ان کا کہنا تھا کہ سائبر سکیورٹی ایک نیا چیلنج ہے، این سی سی آئی اے کی استعدادکار بڑھائی جائے گی اور افسروں کو تربیت کے لئے بیرون ملک بھجوایا جائے گا۔
