کراچی:(دنیا نیوز) شہر قائد میں نیشنل ہائی وے پرمتنازع کینالز کے خلاف احتجاج میں مظاہرین نے پولیس موبائل کو آگ لگا دی، مظاہرین کے پتھراؤ سے کئی اہلکار بھی زخمی ہوئے۔
وکلاء اور قوم پرست جماعتوں نے ملیر لنک روڈ کو بند کردیا ، پولیس کی نفری لنک روڈ پر تعینات کردی گئی ، کسی بھی ناخوشگوار واقعے سے نمٹنے کے لئے واٹر کینن بھی لنک روڈ منگوالیا گیا جبکہ وکلاء بن قاسم اور سٹیل ٹاؤن تھانے سے نکل گئے۔
گلشن حدید لنک روڈ پر مظاھرین کی بڑی تعداد دھرنے میں پہنچ گئی، وکلاء اور قوم پرست جماعتوں کے کارکنان میں تصادم کا سلسلہ جاری رہا، وکلاء اور مظاہرین کا پولیس پر پتھراؤ سے متعدد اہلکار زخمی ہو گئے، مشتعل مظاہرین نے پولیس موبائل کو بھی توڑ پھوڑ کا نشانہ بنایا۔
مظاہرین نے وفاقی حکومت اور پولیس کے خلاف شدید نعرے بازی کی اور کینال منصوبہ کا نوٹیفکیشن جاری کرنے کا مطالبہ کیا ، مظاہرین نے نیشنل ہائی وے پر ٹائر جلائے اور رکاوٹیں لگا کر نیشنل ہائی وے کو بند کردیا گیا۔
دوسری جانب احتجاج کے دوران پولیس پسپائی کا شکار نظر آئی، مظاہرین نے پولیس موبائل کو گھیر لیا، پولیس کی نفری موبائل چھوڑ کر فرارہو گئی، مظاہرین نے پولیس موبائل مکمل طور پر تباہ کردی، مظاہرین نے پولیس موبائل کو آگ لگا دی۔
