اسلام آباد : (دنیا نیوز) وزیر دفاع خواجہ آصف نے کہا ہے کہ بھارت کو کاری ضرب لگائی ہے، بھارت کو ایسا جواب دیا کہ تین چار دن کا قرض پوراہوگیا۔
انہوں نے کہا کہ بھارت نے چار پانچ دن سے تماشہ لگایا ہوا تھا، جواب تو دینا تھا، ہماری افواج نے مؤثر جواب دیا ہے، دوبارہ کوئی بھارتی جارحیت ہوئی تو منہ توڑ جواب دیں گے، بھارت کی جانب سے کسی بھی جارحیت کی توقع کی جاسکتی ہے۔
انہوں نے یہ بھی بتایا کہ بھارت کو چوٹیں لگی ہیں، ان کی ٹکور شکور کر رہے ہیں، بھارت کو پیغام معاملہ ادھر ہی لپیٹ لیں ورنہ بہت نقصان اٹھائیں گے، ہم نے 6 گھنٹوں میں بھارت کو بتا دیا ہے کہ ہم کیا کر سکتے ہیں۔
خواجہ آصف کا یہ بھی کہنا تھا کہ بی ایل اے کا بھی پاکستان سے کوئی تعلق نہیں، بی ایل اے والے بھی ہندوستانی ہیں، پی ٹی آئی دورمیں پلوامہ واقعہ ہوا، پہلے کلبھوشن بھی پکڑا گیا۔
انہوں نے واضح کیا کہ ہماری افواج پچھلے 20سال سے حالت جنگ میں ہیں، پاکستان کی افواج دنیا کی بہترین افواج ہیں، افواج پاکستان ملک کے چپے چپے کی حفاظت کرنا جانتی ہیں، عوام یکجا ہوکر اپنی افواج کے پیچھے سیسہ پلائی دیوار کی طرح کھڑے ہوں۔
اس سے پہلے وزیر دفاع خواجہ آصف نے ایکس پر ٹوئٹ کرتے ہوئے فیض کے مصرعہ کے ذریعے اپنے جذبات کا اظہار کیا کہ ’جو وہ قرض رکھتے تھے جان پر، وہ حساب آج چکا دیا۔‘
