اسلام آباد: (دنیا نیوز) 26 نومبر احتجاج کیس سے متعلق مقدمات کی سماعت کے دوران عدالت نے پی ٹی آئی کے 2 غیر حاضر ملزمان کے وارنٹ گرفتاری جاری کر دیئے۔
انسداد دہشت گردی عدالت اسلام آباد میں 26 نومبر کے احتجاج کے حوالے سے پاکستان تحریک انصاف (پی ٹی آئی) کے کارکنان کے خلاف درج مقدمات کی سماعت ہوئی، کیس کی سماعت انسداد دہشت گردی عدالت کے جج طاہر عباس سپرا نے کی۔
عدالت نے آئندہ سماعت پر تمام ملزمان کی حاضری یقینی بنانے کی ہدایت کرتے ہوئے کیس کی مزید سماعت 15 جولائی تک ملتوی کر دی، اگلی سماعت میں ملزمان کو چالان کی نقول تقسیم کی جائیں گی۔
عدالت نے غیر حاضری پر دو ملزمان کے وارنٹ گرفتاری بھی جاری کر دیئے، عدالت میں وکلا مرتضیٰ حسین طوری، سردار مصروف، آمنہ علی، زاہد بشیر ڈار سمیت دیگر نے پیش ہو کر دلائل دیئے۔
واضح رہے کہ اس مقدمے میں سابق خاتون اول بشریٰ بی بی سمیت پی ٹی آئی کی اعلیٰ قیادت کو بھی نامزد کیا گیا ہے تاہم عدالت میں تاحال صرف کارکنان کی حد تک چالان پیش کیا گیا ہے، مقدمہ تھانہ کوہسار میں درج ہے۔
