لاہور: (دنیا نیوز) سابق وفاقی وزیر فواد چودھری نے کہا کہ بانی کے بیٹوں کی تحریک میں شرکت سے اثر تو بہت ہوگا، تحریک انصاف کے ورکرز کو بہت حوصلہ ملے گا۔
دنیا نیوز کے پروگرام ’’آن دی فرنٹ‘‘ میں گفتگو کرتے ہوئے فواد چودھری نے کہا کہ سلیمان اور قاسم خان کی ایئرپورٹ آمد پر بہت بڑا استقبال ہوگا۔
انہوں نے کہا کہ سلیمان اور قاسم کو حکومت کے لیے گرفتار کرنا اتنا آسان نہیں ہوگا، پاکستان میں احتجاج کے بجائے سیاسی سیٹلمنٹ کی طرف بڑھنا ہوگا۔
فواد چودھری کا کہنا تھا کہ عوام حکومت نہیں بانی پی ٹی آئی کے ساتھ کھڑے ہیں، تحریک انصاف کو پُرامن احتجاج کی بھی اجازت نہیں ہے۔
سابق وفاقی وزیر نے کہا کہ جب تک حکومت، تحریک انصاف، اسٹیبلشمنٹ ایک دوسرے کو سپیس نہیں دیتے ملک میں عدم استحکام رہے گا۔
انہوں نے کہا کہ فیلڈ مارشل کی امریکی صدر سے ملاقات پاکستان کی کامیابی ہے، بھارت کو شکست سے پاکستان کی پوزیشن مضبوط ہوئی۔
