پشاور: (دنیا نیوز) انڈس ہائی وے کی سکیورٹی اور ٹریفک کی خراب صورتحال کے خلاف پشاور ہائیکورٹ میں دائر درخواست پر عدالتی احکامات کے بعد متعلقہ افسران کی رپورٹ عدالت میں جمع کرا دی گئی۔
رپورٹ کے مطابق انڈس ہائی وے پر کوہاٹ اور کرک میں ٹریفک کنٹرول کے لیے صرف دو موبائل وینز اور 7 ہائی وے ٹریفک پولیس اہلکار موجود تھے، عدالتی احکامات کے بعد کوہاٹ میں ٹریفک اہلکاروں کی تعداد بڑھا کر 28 کرنے کا فیصلہ کیا گیا ہے، اسی طرح کوہاٹ ٹنل اور درہ آدم خیل بازار میں 16 اہلکار جبکہ کوہاٹ بورڈ اور لاچی بازار میں 4،4 اہلکار تعینات کئے جائیں گے۔
رپورٹ میں بتایا گیا ہے کہ کرک میں ٹریفک کنٹرول کے لیے 12 اہلکار مقرر کئے گئے ہیں جبکہ کوہاٹ اور کرک میں ہائی وے ٹریفک یونٹ کی تعداد 3 کر دی گئی ہے اور اہلکاروں کی مجموعی تعداد 20 کی جائے گی۔
عدالتی حکم پر سکیورٹی اور ٹریفک اہلکاروں کی تعداد بڑھانے کے لیے سربراہ پولیس اور متعلقہ حکام کو خط ارسال کر دیا گیا ہے جس کے بعد انڈس ہائی وے کے مختلف مقامات پر 130 سے زائد پولیس اہلکار سیکورٹی کے فرائض سرانجام دیں گے۔
ترجمان کے مطابق انڈس ہائی وے پر سکیورٹی اور ٹریفک کی صورتحال کی بہتری کے لیے عدالتی احکامات پر عمل درآمد شروع کر دیا گیا ہے۔
