اسلام آباد: (دنیا نیوز) وفاقی وزارت داخلہ کے تمام ذیلی اداروں کے مابین کوآرڈینیشن بڑھانے کا فیصلہ کیا گیا ہے۔
وفاقی وزیر داخلہ محسن نقوی کی زیرصدارت خصوصی اجلاس ہوا جس میں تمام ذیلی اداروں کے سربراہان اور متعلقہ اعلیٰ حکام نے شرکت کی۔
وزیر داخلہ محسن نقوی نے سروس ڈلیوری کی بہتری اور اچھے نتائج کے لئے حصول کیلئے جامع پلان طلب کر لیا۔
انہوں نے تمام ذیلی اداروں کو 3 دن میں قواعد و ضوابط میں تبدیلی اور دیگر ضروری سفارشات پیش کرنے کی ہدایت کر دی جبکہ وفاقی سیکرٹری داخلہ کو حتمی پلان پیش کرنے کا حکم دے دیا۔
محسن نقوی نے کہا کہ ذیلی اداروں کے مابین کوآرڈینیشن کا فقدان ہے، جسے ہنگامی بنیادوں پر بہتر بنانا ہے، کارکردگی کو مزید بہتر و مؤثر بنانے کیلئے تمام ذیلی اداروں کے مابین مربوط ہم آہنگی و اشتراک کار بڑھانے کی ضرورت ہے، ہر ادارے کی ضروریات اور دستیاب وسائل کی تفصیلات وضع کی جائیں۔
ان کا کہنا تھا کہ ہر ادارہ دوسرے اداروں کی معاونت کے طریقہ کار کے بارے ٹھوس پلان مرتب کرے، تمام ذیلی اداروں میں مؤثر ربط و ہم آہنگی کے نتائج سے فائدہ عوام کو ہوگا، ایک دوسرے کی صلاحیتوں سے بھرپور استفادہ کر کے ہی اداروں کی استعدادکار بڑھائی جا سکتی ہے۔
وزیر مملکت داخلہ طلال چودھری، سیکرٹری داخلہ، ایڈیشنل سیکرٹریز، ڈی جی ایف آئی اے، کمانڈنٹ فیڈرل کانسٹیبلری، کمانڈنٹ نیشنل پولیس اکیڈمی، ڈی جی نیشنل پولیس بیورو، ڈی جی پاسپورٹ اینڈ امیگریشن، ڈی جی نیشنل سائبر کرائم انویسٹی گیشن ایجنسی، ڈی جی نیشنل فرانزک ایجنسی، چیف کمشنر اسلام آباد، آئی جی اسلام آباد پولیس، ڈی سی اسلام آباد، چیف آپریٹنگ آفیسر نادرا اورڈائریکٹر اینٹی نارکوٹکس فورس نے اجلاس میں شرکت کی۔
