لاہور: (دنیا نیوز) وزیراعلیٰ پنجاب مریم نواز شریف کی ہدایات کے پیش نظر پی ڈی ایم اے نے مون سون بارشوں اور ممکنہ سیلاب کے خطرات کے حوالے سے فیکٹ شیٹ جاری کر دی۔
فیکٹ شیٹ کے مطابق گزشتہ 24 گھنٹوں میں پنجاب کے مختلف اضلاع میں مون سون بارشیں ریکارڈ کی گئیں، سرگودھا میں 69 ملی میٹر، نورپور تھل 59 ملی میٹر، منڈی بہاؤالدین 50 ملی میٹر، حافظ آباد 44 ملی میٹر اور شیخوپورہ میں 32 ملی میٹر بارش ریکارڈ کی گئی۔
اس کے علاوہ لاہور، نارووال، سیالکوٹ، ٹوبہ ٹیک سنگھ اور ڈیرہ غازی خان میں بھی بارشیں ہوئیں، آئندہ 24 گھنٹوں میں لاہور، راولپنڈی اور پنجاب کے دیگر اضلاع میں مزید بارشوں کی توقع ہے، مون سون بارشوں کا چوتھا سلسلہ 25 جولائی تک جاری رہنے کا امکان ہے۔
پی ڈی ایم اے نے صوبے کے دریاؤں اور ندی نالوں میں طغیانی کے خدشات ظاہر کئے ہیں، اس وقت دریائے سندھ میں کالا باغ اور چشمہ کے مقام پر درمیانے درجے کا سیلاب ہے، جبکہ تربیلا اور تونسہ کے مقام پر نچلے درجے کی سیلابی صورتحال برقرار ہے۔
دریائے چناب، راوی، جہلم اور ستلج میں پانی کا بہاؤ نارمل سطح پر ہے، منگلا ڈیم میں پانی کی سطح 53 فیصد اور تربیلا ڈیم میں 79 فیصد پانی موجود ہے، انڈین ڈیمز میں پانی کی سطح تقریباً 36 فیصد ہے۔
رپورٹ کے مطابق بارشوں کے نتیجے میں پنجاب میں 143 شہری جاں بحق ہو چکے، 200 گھر متاثر ہوئے ہیں اور 488 شہری زخمی ہوئے ہیں، چھت گرنے کے باعث ایک شہری جاں بحق اور تین زخمی ہوئے ہیں، جبکہ 121 مویشی بھی ہلاک ہو چکے ہیں، آسمانی بجلی گرنے، کرنٹ لگنے اور دریاؤں میں نہاتے ہوئے ڈوبنے سے بھی اموات رپورٹ ہوئی ہیں۔
وزیراعلیٰ پنجاب کی ہدایات پر صوبے بھر کی انتظامیہ اور متعلقہ محکموں کو الرٹ جاری کر دیا گیا ہے۔
پی ڈی ایم اے نے کنٹرول روم اور ڈسٹرکٹ ایمرجنسی آپریشن سینٹرز کو 24/7 صورتحال مانیٹر کرنے کی ہدایات دی ہیں، حکومتی اداروں کو نشیبی علاقوں سے پانی کی نکاسی کی ہدایات دی گئی ہیں۔
اس کے علاوہ دریاؤں، نہروں اور برساتی نالوں میں نہانے پر مکمل پابندی عائد کی گئی ہے اور اس کی خلاف ورزی پر سخت کارروائی کی جائے گی، شہریوں کو خراب موسم میں غیر ضروری سفر سے گریز کرنے اور بجلی کے کھمبوں اور تاروں سے دور رہنے کی ہدایات دی گئی ہیں، مخدوش اور بوسیدہ مکانات میں رہائش نہ رکھنے کی ہدایت بھی کی گئی ہے۔
پی ڈی ایم اے کے ڈی جی عرفان علی کاٹھیا نے کہا ہے کہ مون سون بارشوں اور ممکنہ سیلابی خطرات کے پیش نظر تمام انتظامات مکمل ہیں اور ہم شہریوں کی حفاظت کیلئے مکمل طور پر تیار ہیں، شہریوں سے درخواست کی گئی ہے کہ وہ اپنے گھروں کو محفوظ رکھیں اور ہنگامی صورتحال میں فوری اقدامات کریں۔
پی ڈی ایم اے کے کنٹرول روم اور ہیلپ لائن 1129 پر 24/7 معلومات فراہم کی جا رہی ہیں اور شہریوں کو ہنگامی حالات میں رابطہ کرنے کی ہدایت کی گئی ہے۔
