پشاور: (دنیا نیوز) وزیر اعلیٰ خیبر پختونخوا علی امین گنڈاپور نے کہا ہے کہ خیبر، باجوڑ اور وزیرستان میں بدامنی افسوسناک ہے۔
وزیر اعلیٰ خیبر پختونخوا علی امین گنڈاپور کے زیر صدارت صوبائی ایپکس کمیٹی کا اجلاس ہوا، وزیر اعلیٰ کے مشیر برائے اطلاعات، کمانڈر پشاور، چیف سیکرٹری اور آئی جی پی کے علاوہ اعلیٰ سول و عسکری حکام نے شرکت کی۔
اجلاس میں خصوصی دعوت پر ضلع باجوڑ، خیبر اور شمالی وزیرستان کے ممبران قومی و صوبائی اسمبلی نے بھی شرکت کی، صوبے خصوصاً ضم اضلاع میں امن کی صورتحال کا تفصیلی جائزہ لیا گیا۔
متعلقہ حکام کی جانب سے اجلاس کو موجودہ سکیورٹی چیلنجز کے مختلف پہلوؤں پر بریفنگ دی گئی، اجلاس میں دہشتگردی کے واقعات میں شہید ہونے والے سویلینز، پولیس اور سکیورٹی اہلکاروں کو خراج عقیدت پیش کیا گیا۔
اجلاس میں دہشت گردی کے خلاف مل جل کر کوششیں جاری رکھنے کے عزم کا اظہار کیا گیا، دہشت گردی کے خاتمے کے لئے کارروائیوں میں عوام کے بھر پور اعتماد حاصل کرنے کے لئے اقدامات پر اتفاق کیا۔
دہشت گردوں کے خلاف موثر کارروائیوں کے لئے سول انتظامیہ، پولیس، سکیورٹی فورسز اور انٹیلی جنس اداروں کے درمیان کوآرڈی نیشن کو بہتر بنانے پر زور دیا گیا۔
ایپکس کمیٹی کے مطابق دہشتگردی ایک ناسور بن چکا ہے جس کے مستقل بنیادوں پر خاتمے کے لئے حکومت، عوام اور اداروں کو مل کام کرنا ہوگا۔
اجلاس کے بعد علی امین گنڈا پور نے اپنے ویڈیو پیغام میں کہا کہ دہشت گرد سب کے مشترکہ دشمن ہیں اور سب دہشت گردی کا خاتمہ چاہتے ہیں، دہشت گردوں کے سہولت کاروں کی نشان دہی ضروری ہے، دہشت گردوں کو آبادی سے دور لے کر جانا ہے تاکہ وہ اپنے مقصد میں ناکام ہوں۔
انہوں نے کہا کہ پاکستان کے دشمن ممالک کبھی نہیں چاہتے کہ پاکستان میں امن ہو، دہشت گردی کے تانے بانے ان دشمن ممالک سے ملتے ہیں، ایک سازش کے تحت حکومت، عوام اور فورسز کے درمیان عدم اعتماد پیدا کیا جارہا ہے۔
وزیراعلیٰ علی امین گنڈا پور کا کہنا تھا کہ ہم سب نے مل کر سازش کرنے والے ایسے لوگوں کو بے نقاب کرنا ہے، عوام کے بغیر نہ یہ جنگ لڑی جاسکتی ہے اور نہ ہی جیتی جا سکتی ہے۔
