اسلام آباد: (دنیا نیوز) سرکاری حج سکیم کے تحت درخواستوں کی وصولی کا دوسرا مرحلہ شروع ہوگیا، غیر رجسٹرڈ عازمین سے حج درخواستوں کی وصولی بھی شروع کر دی گئی۔
سرکاری سکیم کیلئے کم درخواستیں آنے پر غیر رجسٹرڈ عازمین کو موقع دیا گیا، سرکاری سکیم کے تحت 60.3 فیصد درخواستیں موصول ہو چکی، 39.7 فیصد کوٹہ رہ گیا، 6 روز میں 71 ہزار 286 رجسٹرڈ عازمین نے بینکوں میں درخواستیں جمع کرائیں، جبکہ ایک لاکھ 18 ہزار 210 کوٹے میں سے 46 ہزار 924 نشستیں بدستور خالی ہیں۔
سرکاری سکیم کا حج کوٹہ مکمل ہوتے ہی درخواستوں کی وصولی روک دی جائےگی، حج اخراجات کی پہلی قسط کے ساتھ درخواستیں 16 اگست تک جمع کرائی جا سکتی ہیں،لانگ حج کے لئے اخراجات کی پہلی قسط 5 لاکھ روپے وصول کی جا رہی ہے۔
اس کے علاوہ شارٹ حج کیلئے ساڑھے 5 لاکھ روپے کی پہلی قسط جمع کرائی جا سکتی ہے، سمندر پار پاکستانی بھی قریبی عزیزوں کے ذریعے بینکوں میں حج درخواستیں کرا سکتے ہیں، بیرون ملک مقیم افراد کو وطن واپسی پر میڈیکل فٹنس سرٹیفکیٹ جمع کرانے ہوں گے۔
