سعودی عرب کا قومی دن منانے کی تیاریاں، وفاقی دارالحکومت کو سجا دیا گیا

اسلام آباد: (دنیا نیوز) سعودی عرب کا قومی دن بھرپور انداز سے منانے کی تیاریاں، وفاقی دارالحکومت کو سجا دیا گیا۔

اسلام آباد کی اہم عمارتیں اور شاہرائیں سبز رنگ کی روشنیوں سے مزین، چاروں طرف سبز رنگ کی روشنیوں میں نہائی عمارتیں نہایت خوبصورت منظر پیش کرنے لگیں۔

شاہراہ دستور ، سری نگر ہائی وے، قائد اعظم ایونیو اور فیصل ایونیو پر لگی سبز لائٹوں نے بھی شہر میں سما باندھ دیا۔

شاہراہ دستور اور سری نگر ہائی وے پر وزیر اعظم ، سعودی فرمانروا ، ولی عہد اور فیلڈ مارشل کی تصاویر والے سٹیمرز بھی آویزاں کر دیئے گئے۔

ڈی چوک پر بھی شہباز شریف، شاہ سلمان، محمد بن سلمان اور فیلڈ مارشل عاصم منیر کی تصاویر والی ہورڈنگز نصب کئے گئے ہیں۔

خوشی ہے پاکستان میں سعودی عرب کا قومی دن جوش و جذبے سے منایا جا رہا ہے: نائب قونصل جنرل سعودی عرب

سعودی عرب کے قومی دن کے موقع پر کراچی پریس کلب چورنگی پر سعودی عرب کا قومی دن منایا گیا۔

نائب قونصل جنرل سعودی عرب عبدالرحمان جمعہ نے کہا کہ مجھے خوشی ہے پاکستان میں سعودی عرب کا قومی دن جوش و جذبے سے منایا جا رہا ہے۔

عبدالرحمان جمعہ نے کہا کہ پاکستان اور سعودی عرب کے درمیان دفاعی معاہدے نے دونوں ممالک کی دوستی مزید مضبوط کردی۔

انہوں نے کہا کہ میں گورنر سندھ اور ان کے صاحبزادے زید خان ٹیسوری کا شکریہ ادا کرتا ہوں، اس موقع پر سعودی عرب کا قومی ترانہ بھی بجایا گیا۔

پریس کلب چورنگی کو برقی قمقموں اور پاکستان اور سعودی عرب کے پرچموں سے سجایا گیا، سعودی عرب کے قومی دن کے موقع پر آتشبازی کا مظاہرہ کیا گیا۔