اسلام آباد: (دنیا نیوز) جے یو آئی (ف) کے مرکزی رہنما حافظ حمد اللہ نے کہا ہے کہ آئینی ترمیم سے ادارے نہیں بلکہ شخصیات مضبوط ہوئی ہیں۔
دنیا نیوز کے پروگرام ’’دنیا مہر بخاری کے ساتھ‘‘ میں گفتگو کرتے ہوئے رہنما جے یو آئی (ف) حافظ حمد اللہ نے کہا کہ یہ سارے وہی لوگ ہیں جنہوں نے 1973ء کا آئین دیا، ان میں سے کسی کو بھی شرم نہیں آئی، قانون سازی کرتے ہوئے قوم اور ملک کے مفاد کو سامنے رکھا جاتا ہے، پوری ترمیم میں قوم اور ملک کے مفاد کا ایک نکتہ نہیں۔
رہنما جے یو آئی (ف) نے کہا کہ ملک کو مضبوط کرنا ہے تو اداروں کو کریں، اس ترمیم سے پارلیمان مضبوط نہیں ہوئی، حکومت آئین کے خلاف جنگ لڑ رہی ہے، اگر ججز استعفے دیتے ہیں تو ریاست ہل جائے گی، پیپلز پارٹی اور ن لیگ کی سیاست زمین بوس ہو چکی ہے، یہ عوام میں جا کر دیکھیں، ان کی کوئی حیثیت نہیں ہے، بچہ بچہ جانتا ہے کہ ملک میں کیا ہو رہا ہے۔
پروگرام میں موجود ن لیگ کی سینئر رہنما اور کوآرڈینیٹر وزیراعظم اختیار ولی خان نے کہا کہ غلط چیزوں کو درست کرنا چاہتے ہیں، جے یو آئی نے ترمیم کی مخالفت کی، یہ ان کا جمہوری حق ہے، جے یو آئی نے 26ویں ترمیم کی حمایت کی تھی۔
اختیار ولی خان کا مزید کہنا تھا صدر مملکت کو استشنیٰ دینا دنیا میں پہلی بار نہیں ہوا، ثاقب نثار نے ہمارے وزیراعظم کو پانامہ کے بجائے اقامہ پر نکالا، استعفے بھی آ جائیں تو کوئی فرق نہیں پڑے گا، آئینی عدالت ضروری ہے۔
