سپریم کورٹ کے ججز جسٹس منصور علی شاہ اور جسٹس اطہر من اللہ مستعفی

اسلام آباد: (دنیا نیوز) سپریم کورٹ کے جج جسٹس سید منصور علی شاہ اور جسٹس اطہر من اللہ نے استعفیٰ دے دیا۔

دونوں ججز نے سپریم کورٹ سے اپنے چیمبر بھی خالی کر دیئے، جسٹس منصور علی شاہ کا استعفیٰ پانچ صفحات پر مشتمل ہے۔

سپریم کورٹ کے سینئر جج جسٹس منصور علی شاہ نے اپنا استعفیٰ صدر مملکت آصف علی زرداری کو بھجوا دیا ہے۔

 اپنے استعفے میں سپریم کورٹ کے سینئر ترین جج جسٹس منصور علی شاہ نے کہا کہ 27 ویں آئینی ترمیم نے عدلیہ کو حکومت کے ماتحت بنا دیا ہے، اس ترمیم نے ہماری آئینی جمہوریت کی روح پر کاری ضرب لگائی ہے۔

 انہوں نے کہا کہ انصاف عام آدمی سے دور، کمزور اور طاقت کے سامنے بے بس ہوگیا ہے، ملک کی واحد اعلیٰ ترین عدالت کو منقسم کر کے اور عدلیہ کی آزادی کو پامال کرنے سے ملک کو دہائیوں پیچھے دھکیل دیا گیا ہے۔

جسٹس منصور علی شاہ نے کہا کہ تاریخ گواہ ہے کہ آئینی نظم و نسق کی ہیئت میں اس طرح کی تبدیلیاں زیادہ دیرپا ثابت نہیں ہوتیں۔

انہوں نے کہا کہ اس نازک موڑ پر میرے سامنے دو ہی راستے ہیں، یا تو میں ایک ایسے نظام کا حصہ بن کر رہوں جو اس ادارے کی ہی بیخ کنی کرتا ہے، جس کے تحفظ کا میں نے حلف لیا ہے، یا پھر احتجاجاً اس کے خلاف کھڑے ہوکر عہدہ سے دستبردار ہوجاؤں۔

جسٹس منصور علی شاہ نے استعفیٰ کے متن میں کہا کہ عہدے سے وابستہ رہنا ایک آئینی دراندازی پر خاموش رضا مندی ہوتی، 27 ویں آئینی ترمیم آئین پاکستان پر سنگین حملہ ہے، سپریم کورٹ کے سینئر ترین جج کی حیثیت سے اپنا استعفیٰ پیش کرتا ہوں۔

انہوں نے کہا کہ صاف ضمیر کے ساتھ جا رہا ہوں، مجھے کوئی ہچھتاوا نہیں ہے، جسٹس منصور نے احمد فراز کے اشعار بھی لکھے۔

جسٹس منصور علی شاہ نے کہا کہ میرا قلم تو امانت ہے میرے لوگوں کی ، میں نے ادارے کی عزت، ایمانداری اور دیانت کے ساتھ خدمت کی۔

جسٹس اطہر من اللہ

جسٹس اطہر من اللہ نے اپنے استعفیٰ میں کہا کہ جس آئین کے تحفظ کا حلف اٹھایا تھا وہ باقی نہیں رہا، میں باضابطہ طور پر مستعفی ہوتا ہوں۔

انہوں نے کہا کہ 11 سال پہلے اسلام آباد ہائی کورٹ کے جج کے طور پر حلف اٹھایا، 4 سال بعد اسی عدالت کے چیف جسٹس کے طور پر حلف اٹھایا، مزید 4 سال بعد سپریم کورٹ آف پاکستان کے جج کے طور پر حلف اٹھایا۔

جسٹس اطہر من اللہ نے کہا کہ ستائیسویں ترمیم کے منظور ہونے سے پہلے چیف جسٹس آف پاکستان کو خط لکھا جس میں تشویش کا اظہار کیا۔

انہوں نے کہا کہ میں نے اپنی بہترین صلاحیت اور حلف کے مطابق اپنے فرائض سرانجام دینے کی کوشش کی ہے، آج یہ وہی حلف ہے جو مجھے اپنا باضابطہ استعفیٰ پیش کرنے پر مجبور کرتا ہے۔

جسٹس اطہر من اللہ نے کہا کہ وہ آئین جس کو برقرار رکھنے اور دفاع کرنے کا حلف اٹھایا تھا، اب نہیں رہا، میں نے پوری کوشش کی کہ خود کو قائل کروں کہ آئین زندہ ہے، مگر حقیقت اس کے برعکس ہے۔

انہوں نے کہا کہ یہ عہدہ اور لباس میرے لیے عزت کا باعث تھے مگر اب میں ان کو آخری بار اتار رہا ہوں اور فوری طور پر جج سپریم کورٹ آف پاکستان کے عہدے سے اپنا باضابطہ استعفیٰ پیش کرتا ہوں۔