مظفرآباد( دنیا نیوز) چیف جسٹس آزاد جموں وکشمیر جسٹس راجہ سعید اکرم خان اور سینئر جج سپریم کورٹ جسٹس رضا علی خان نے سپریم کورٹ آزاد جموں و کشمیر کی گولڈن جوبلی تقریبات کی بہترین میڈیا کوریج کے اعتراف میں دنیا نیوز اور روزنامہ دنیا سمیت متعدد صحافیوں اور میڈیا ہاؤسز کو تعریفی شیلڈز دیں۔
دنیا نیوز کی تعریفی شیلڈ بیورو چیف آزاد جموں و کشمیر محمد اسلم میر نے چیف جسٹس سپریم کورٹ جسٹس راجہ سعید اکرام خان سے وصول کی، اس پروقار تقریب کا انعقاد سپریم کورٹ میں کیا گیا۔
تقریب سے خطاب کرتے ہوئے چیف جسٹس راجہ سعید اکرم خان نے سپریم کورٹ آزاد جموں وکشمیر کی گولڈن جوبلی تقریبات کی بہترین میڈیا کوریج پرمیڈیا کے کردار کو سراہتے ہوئے کہا کہ گولڈن جوبلی تقریبات ایک سنگ میل تھا، سپریم کورٹ کے پچاس سال پورے ہونے پر جس طرح آزادجموں وکشمیر اور پاکستان کا امیج دنیا کے سامنے ہائی لائٹ ہوا ہے اس میں میڈیا کا کردار لائق تحسین تھا۔
انہوں نے کہا کہ آزاد کشمیر کے عوام کے فیصلے ان کی اپنی سپریم کورٹ مظفرآباد میں کرتی ہے جبکہ مقبوضہ جموں وکشمیر کے عوام کے فیصلے نئی دلی میں بھارتی سپریم کورٹ میں ہوتے ہیں۔
چیف جسٹس آزاد جموں و کشمیر نے کہا کہ گولڈن جوبلی تقریبات کے موقع پر جوڈیشل کانفرنس میں چیف جسٹس پاکستان اور چاروں صوبوں اور گلگت بلتستان سے معزز جج صاحبان کی شرکت ہمارے لیے باعث اطمینان تھا، جوڈیشل کانفرنس سے لائن آف کنٹرول کے دوسری جانب یکجہتی کا پیغام گیا۔
انہوں نے کہا کہ پاکستان ہماری امیدوں کا مرکز ہے، ہماری عدالتیں اپنی حدود میں رہتے ہوئے احسن انداز میں کام کررہی ہیں، پاکستان کی عدلیہ بھی آزادجموں وکشمیر کے عدلیہ کے فیصلوں سے رہنمائی لیتی ہے جو کہ ہمارے لئے باعث اعزاز ہے، آزادکشمیر میں نامور ججز گزرے ہیں۔ موجودہ دور میں میڈیا کا کردار نہایت اہم ہے۔
گولڈن جوبلی کی تقریبات کے انعقاد سے نہ صرف قومی یکجہتی کو فروغ ملا بلکہ مقبوضہ جموں و کشمیر میں جاری بھارتی ریاستی دہشت گردی کی مذمت بھی کی گی اور اقوام متحدہ سے مطالبہ کیا گیا کہ مقبوضہ جموں و کشمیر کی عوام کو حق خود ارادیت دیا جائے، گولڈن جوبلی کی تقریبات کے دوران پاک فوج کے شہدا اور آپریشن بنیان مرصوص کی شاندار کامیابی پر پاک فوج کو خراج تحسین پیش کیا گیا۔
گولڈن جوبلی کی تقریبات کی بہترین میڈیا کوریج کے اعتراف میں دیگر صحافیوں جن میں وائس چیئرمین پریس فاؤنڈیشن سردار ذوالفقار علی، صدر سینٹرل پریس کلب سجاد قیوم میر، محمد عارف عرفی، سردار رضا، سید آفاق حسین شاہ ، آزادجموں وکشمیر ٹیلی ویژن کے جنرل منیجر غضنفر عبداللہ، پی ٹی وی کے راجہ عدیل خان، محکمہ اطلاعات کے افسران راجہ محمد سہیل خان اور راجہ عبدالباسط خان کو تعریفی شیلڈ ز دیں جبکہ سینئر جج سپریم کورٹ جسٹس رضا علی خان نے سینئر صحافی ظہیر احمد جگوال ، محمد شبیر اعوان، محکمہ اطلاعات کے فوٹوگرافرز/ کیمرہ مین صدام شاہ، ملک شبیر، راشد احمد اور زاہد خٹک کو تعریفی شیلڈ ز دیں۔
چیف جسٹس آزاد جموں و کشمیر نے ہائیکورٹ آزاد جموں و کشمیر کے اسسٹنٹ رجسٹرار پروٹوکول احسن امتیاز اور اسسٹنٹ رجسٹرار انتظامیہ رانا خالد کو بھی تعریفی شیلڈز دیں۔
اس موقع پر دنیا نیوز کے بیورو چیف محمد اسلم میر نے چیف جسٹس سپریم کورٹ جسٹس راجہ سعید اکرم کا شکریہ ادا کرتے ہوئے کہا کہ بطور چیف جسٹس آپ کے دور میں آزاد جموں و کشمیر میں ماحولیاتی توازن کو برقرار رکھنے کے لئے غیر قانونی کرش پلانٹس کو نہ صرف بند کر دیا گیا بلکہ آزاد جموں و کشمیر میں آپ کی ذاتی دلچسپی سے دس اضلاع میں ملاوٹ شدہ دودھ اور دیگر اشیا کی فروخت پر بھی پابندی لگا دی گی۔
اس موقع پر چیف جسٹس راجہ سعید اکرم خان کی والدہ مرحومہ کے ایصال ثواب کے لیے خصوصی دعا بھی کی گئی۔
