کراچی: (دنیا نیوز) صوبہ سندھ میں نجی سکولوں کو موسم سرما میں مخصوص کلر یا ڈیزائن کی جیکٹ پہننے کی پابندی سے روک دیا گیا۔
وزیرِ تعلیم سندھ سردار شاہ کی ہدایت پر ڈائریکٹوریٹ آف پرائیویٹ انسٹی ٹیوشنز نے صوبہ بھر کے تمام نجی سکولوں کو ہدایت نامہ جاری کر دیا ہے۔
ایڈیشنل ڈائریکٹر آف پرائیویٹ انسٹی ٹیوشنز سندھ رفیعہ جاوید نے واضح طور پر کہا کہ بچے سردیوں میں اپنی پسند کے گرم کپڑے اور جیکٹ پہن سکتے ہیں، سکول انتظامیہ بچوں کو مخصوص گرم لباس پہننے پر مجبور نہیں کرے گی، خلاف ورزی کرنے والے سکولوں کے خلاف کارروائی کی جائے گی۔
وزیرِ تعلیم سندھ سردار شاہ کا کہنا تھا کہ سردیوں میں بچوں کی صحت ترجیح ہے، زبردستی کی مخوص گرم جیکٹس کی اجازت نہیں، بچے کسی بھی رنگ اور کسی بھی ڈیزائن کی گرم جیکٹ پہن سکتے ہیں، موسم سرما میں بچوں کی سہولت اولین ترجیح ہے۔
