اسلام آباد:(دنیا نیوز) وزیراعظم کے مشیر رانا ثنا اللہ نے کہا ہے کہ چیف آف ڈیفنس فورسز کی تعیناتی کے ساتھ ایک نیا ادارہ بنایا جا رہا ہے جو انتہائی اہمیت کا حامل ہوگا، اور یہ نوٹیفکیشن عجلت میں نہیں ہوگا۔
نجی ٹی وی سے گفتگو کرتے ہوئے رانا ثنا اللہ کا کہنا تھا کہ وزیراعظم کی واپسی کے بعد جتنا وقت ضروری ہوگا، اسی حساب سے نوٹیفکیشن جاری کیا جائے گا۔
اُنہوں نے وضاحت کی کہ آئین کے بعد قوانین اور قوانین کے بعد رولز فریم کیے جاتے ہیں، اس لیے یہ تمام معاملات احتیاط کے ساتھ طے کیے جائیں گے۔
مشیر وزیر اعظم کا کہنا تھا کہ کسی بھی معاملے کا زیرِ غور ہونا اور فیصلہ ہونے میں فرق ہوتا ہے اور مختلف آپشنز مختلف اوقات میں زیرِ غور رہتے ہیں۔ نوٹیفکیشن کے بعد ادارے کی مدت 5 سال ہوگی اور یہ آئینی ترمیم کے مطابق ہوگی۔
رانا ثنا اللہ نے نواز شریف سے متعلق کہا کہ سابق وزیراعظم نے کبھی چیف آف ڈیفنس فورسز کے نوٹیفکیشن میں رکاوٹ ڈالنے کی کوشش نہیں کی اور اُن کی گفتگو کو بے بنیاد طور پر اس معاملے سے جوڑا جا رہا ہے۔
اُن کا مزید بتایا کہ پی ٹی آئی کے ایک وفد نے سپیکر کے پاس ملاقات کی درخواست دی تھی، جس میں وہ خود بھی موجود تھے، اور اُنہیں کہا گیا کہ وزیراعظم کی واپسی کے بعد مسئلہ ان کے سامنے رکھا جائے گا، تاہم وفد کے جانے کے بعد وزیراعلیٰ کی جانب سے دھمکی دی گئی، جس کے سبب اُن کی ملاقات کی اجازت نہیں دی جا سکی۔
