لاہور: (دنیا نیوز) امیر جماعت اسلامی حافظ نعیم الرحمان نے عالمی یومِ معذوراں کے موقع پر حکومت سے مطالبہ کیا ہے کہ خصوصی افراد کے حقوق کی فراہمی ہر سطح پر یقینی بنائی جائے۔
اپنے ایک بیان میں امیر جماعت اسلامی کا کہنا تھا کہ معذور افراد کے لیے ہر ڈویژن میں خصوصی تعلیمی ادارے اور ہسپتال قائم کیے جائیں تاکہ وہ بہتر سہولیات سے فائدہ اٹھا سکیں۔
انہوں نے کہا ہے کہ حکومت ملازمتوں میں معذور افراد کے لیے مختص کوٹے پر مکمل اور شفاف انداز میں عملدرآمد کو یقینی بنائے جبکہ عالمی اداروں کے مطابق پاکستان میں تقریباً دو کروڑ افراد کسی نہ کسی معذوری کا شکار ہیں، اس لیے ان کے لیے خصوصی اقدامات انتہائی ضروری ہیں۔
امیر جماعت اسلامی نے وفاقی اور صوبائی حکومتوں سے مطالبہ کیا کہ خصوصی افراد کو مفت سفری سہولتیں فراہم کی جائیں اور چھوٹے کاروبار کے آغاز کے لیے بلا سود قرضے بھی دیئے جائیں، ساتھ ہی معذور خاندانوں کے بچوں اور بچیوں کے لیے شادی گرانٹ مختص کرنے کی سفارش بھی کی۔
