شکار پور: (دنیا نیوز) سندھ کے حلقہ پی ایس 9 شکارپور میں ضمنی انتخاب کا دنگل آج سجے گا جہاں انتخابی سامان کی ترسیل کا عمل مکمل کر لیا گیا ہے۔
حلقہ پی ایس 9 شکارپور میں 2 لاکھ 77 ہزار 792 رجسٹرڈ ووٹرز اپنا حقِ رائے دہی استعمال کریں گے جن میں ایک لاکھ 48 ہزار 310 مرد جبکہ ایک لاکھ 29 ہزار 482 خواتین ووٹرز شامل ہیں۔
حلقے میں ٹوٹل 178 پولنگ سٹیشنز قائم کیے گئے ہیں جن میں 49 مرد، 49 خواتین اور 80 مشترکہ پولنگ سٹیشنز شامل ہیں، 54 پولنگ سٹیشنز کو انتہائی حساس اور 84 کو حساس قرار دیا گیا ہے۔
پيپلزپارٹی کے آغا شہباز خان درانی، جمعیت علمائے اسلام پاکستان کے مولانا رشد اللہ شاہ سمیت 8 امیدوار میدان میں ہیں، یہ نشست پیپلز پارٹی کے رکن صوبائی اسمبلی آغا سراج درانی کے انتقال کے باعث خالی ہوئی تھی۔
صوبائی الیکشن کمشنر سندھ اعجاز انور چوہان نے متعلقہ اداروں کو سخت ہدایات جاری کرتے ہوئے کہا ہے کہ ضمنی انتخاب کے آزادانہ، منصفانہ اور پُرامن انعقاد کو ہر صورت یقینی بنایا جائے۔
