اسلام آباد: (دنیا نیوز) اقوام متحدہ کے ذیلی ادارے یونیسکو کی تازہ رپورٹ میں انکشاف ہوا ہے کہ دنیا میں اظہارِ رائے کی آزادی میں 10 فیصد کمی اور صحافیوں پر حملوں میں اضافہ ہوا ہے، اس کے ساتھ خواتین صحافیوں کو آن لائن ہراسانی کا بھی سامنا ہے۔
ورلڈ ٹرینڈز اِن فریڈم آف ایکسپریشن اینڈ میڈیا ڈیولپمنٹ رپورٹ 2025-2022 کے مطابق 2012 سے 2024 کے درمیان اظہارِ رائے کی آزادی میں 10 فیصد کمی آئی جو کئی دہائیوں میں بدترین کمی ہے۔
رپورٹ کے مطابق صحافیوں میں سیلف سنسر شپ کے رجحان میں 63 فیصد اضافہ ہوا ہے۔
رپورٹ میں کہا گیا کہ گزشتہ 3 برس میں 186 صحافی ہلاک ہوئے، صرف 2025 میں 93 صحافی مارے گئے جن میں زیادہ تر کی اموات جنگی علاقوں میں ہوئیں جبکہ خواتین صحافیوں پر بھی آن لائن حملے 75 فیصد تک بڑھ گئے ہیں۔
یونیسکو نے حکومتوں سے مطالبہ کیا ہے کہ وہ آزاد، محفوظ اور پیشہ ورانہ صحافت میں سرمایہ کاری کریں، ڈیجیٹل شفافیت کو فروغ دیں اور شہریوں کو میڈیا لٹریسی کی تعلیم دیں تاکہ غلط معلومات اور نفرت انگیزی کا مقابلہ کیا جا سکے۔
