اسلام آباد: (دنیا نیوز) اسلام آباد ٹریفک پولیس نے 2025 کی پرفارمنس آڈٹ رپورٹ جاری کر دی۔
ٹریفک پولیس پرفارمنس رپورٹ کے مطابق رواں سال ٹریفک قوانین کی خلاف ورزیوں میں 45 فیصد جبکہ ٹریفک حادثات کی شرح میں 22 فیصد کمی ریکارڈ کی گئی ہے۔
چیف ٹریفک آفسر (سی ٹی او) اسلام آباد حمزہ ہمایوں کے مطابق دورانِ سال موبائل فون استعمال کرنے پر 7 ہزار 931 جبکہ بغیر ہیلمٹ موٹر سائیکل چلانے پر65 ہزار 784 افراد کو چالان ٹکٹ جاری کیے گئے، ٹریفک قوانین کی سنگین خلاف ورزیوں پر 120 ڈرائیونگ لائسنس اور 90 روٹ پرمٹس معطل کیے گئے۔
رپورٹ کے مطابق کالے شیشوں اور غیر قانونی نمبر پلیٹس والی 21 ہزار 168 گاڑیوں کے خلاف کارروائیاں کی گئیں جس کے نتیجے میں اس مد میں خلاف ورزیوں میں 12 فیصد کمی واقع ہوئی، اسلام آباد ٹریفک پولیس کے پانچ چیک پوائنٹس پر 88 ہزار سے زائد روڈ یوزرز کو چیک کیا گیا جبکہ 2 ہزار 100 شہریوں کو مختلف نوعیت کی مدد فراہم کی گئی۔
سی ٹی او حمزہ ہمایوں نے بتایا کہ لائسنسنگ مہم کی بھرپور کامیابی کے نتیجے میں لائسنس ہولڈرز کی شرح 37 فیصد سے بڑھ کر 81 فیصد تک پہنچ گئی جبکہ سال 2025 کے دوران 5 لاکھ 60 ہزار سے زائد شہریوں کو ڈرائیونگ لائسنس جاری کیے گئے۔
