خلاصہ
- لاہور: (دنیا نیوز) آج سے 23 جنوری تک پنجاب کے بیشتر اضلاع میں بارشوں کا امکان ہے جبکہ مری، گلیات اور دیگر پہاڑی علاقوں میں شدید برفباری اور بارش متوقع ہے۔
پنجاب ڈیزاسٹر مینجمنٹ اتھارٹی (پی ڈی ایم اے) نے لاہور، سرگودھا، گجرانوالہ، ساہیوال، ملتان، فیصل آباد، ڈیرہ غازی خان اور بہاولپور ڈویژن میں بھی بارشوں کی پیشگوئی کی تصدیق کر دی ہے۔
رپورٹ کے مطابق آئندہ چند روز کے دوران موسم مجموعی طور پر سرد اور خشک رہے گا تاہم مختلف شہروں میں وقفے وقفے سے بارش اور پہاڑی علاقوں میں برفباری کا امکان ہے۔
پی ڈی ایم اے پنجاب نے تمام متعلقہ محکموں کو الرٹ رہنے اور حفاظتی اقدامات یقینی بنانے کی ہدایت کی ہے تاکہ ممکنہ سیلاب، لینڈ سلائیڈنگ یا دیگر قدرتی آفات سے بروقت نمٹا جا سکے، خاص طور پر مری میں ضلعی انتظامیہ اور دیگر اداروں کو مکمل طور پر چوکس رہنے کی ہدایات جاری کی گئی ہیں۔
ڈی جی پی ڈی ایم اے پنجاب نے عوام سے اپیل کی ہے کہ وہ موسم کی تازہ صورتحال سے باخبر رہیں، غیر ضروری سفر سے گریز کریں اور احتیاطی تدابیر اختیار کریں تاکہ کسی بھی ممکنہ نقصان سے بچا جا سکے۔
