اس ملاقات میں صحت، تعلیم، زراعت، فلڈ مینجمنٹ، کلائمیٹ ریزیلینس اور دیگر اہم شعبوں میں جاری و مجوزہ منصوبوں پر تفصیلی تبادلہ خیال کیا گیا۔

سینئر صوبائی وزیر نے کہا کہ وزیراعلیٰ پنجاب مریم نواز شریف کے وژن کے تحت ترقیاتی منصوبوں میں شفافیت، ڈیجیٹلائزیشن اور مؤثر منصوبہ بندی کو یقینی بنایا جا رہا ہے، اس مقصد کے لیے پنجاب ون میپ متعارف کرایا گیا ہے جو زمین اور زیرِ زمین تمام فزیکل اثاثوں، آبادی اور انفراسٹرکچر پر مشتمل ایک جامع ڈیجیٹل نقشہ ہے، جس سے تمام سیکٹرز میں بہتر پلاننگ، ڈویلپمنٹ اور مینجمنٹ ممکن ہو سکے گی۔

انہوں نے بتایا کہ تعلیم اور صحت وزیراعلیٰ کی اولین ترجیحات ہیں، جن کے تحت میڈیکل ڈسٹرکٹس، جدید کیتھ لیبز اور تعلیمی سہولیات کے ڈیٹا پر مبنی ڈیمانڈ پلاننگ کی جا رہی ہے، سیف سٹی منصوبہ جون تک پنجاب کے تمام 36 اضلاع میں مکمل کیا جائے گا جبکہ جون تک 1 لاکھ 60 ہزار گھر عوام کو فراہم کیے جا رہے ہیں۔

ای موبیلیٹی ٹرانسپورٹ کے وژن کے تحت گوجرانوالہ اور فیصل آباد میں میٹرو منصوبے، ای بسز اور ای بائیکس متعارف کرائی جا رہی ہیں، سوشل اکنامک رجسٹری کا 98 فیصد ڈیٹا مکمل ہو چکا ہے جبکہ 186 عوامی خدمات کو ڈیجیٹل کر دیا گیا ہے۔

زراعت کے شعبے میں ای موڈرنیزیشن، ایگریکلچر میکانائزیشن، ایگری بزنس مالز، ایکوا کلچر اور شرمپ فارمنگ پر نمایاں پیش رفت ہو رہی ہے، کسانوں کو اس سال 20 ہزار سپریڈرز اور ملچرز فراہم کیے جائیں گے جبکہ سپر سیڈرز کے استعمال سے ماحولیاتی بہتری اور پیداواری لاگت میں کمی آئی ہے۔

فلڈ مینجمنٹ، آبپاشی، کلائمیٹ ایکشن پلان، کولڈ اسٹوریج، لاجسٹکس اور ویلیو ایڈیشن پر بھی مؤثر عملدرآمد جاری ہے، ریجن کی پہلی کلائمیٹ آبزرویٹری کے قیام پر عملی کام شروع ہو چکا ہے۔

ایشیائی ترقیاتی بینک کے وفد نے پنجاب حکومت کی اصلاحات، ڈیجیٹل گورننس اور زرعی ترقیاتی اقدامات کو سراہا اور زراعت، ویلیو ایڈیشن، زرعی برآمدات اور فشریز کے شعبوں میں تعاون کی یقین دہانی کرائی۔

آخر میں سینئر صوبائی وزیر مریم اورنگزیب نے وفد کا شکریہ ادا کیا اور بسنت فیسٹیول میں اہلِ خانہ سمیت شرکت کی دعوت دی۔