لاہور: (ویب ڈیسک) سپورٹس بورڈ پنجاب میں خاتون ملازمہ سے ہراسانی کے معاملے پر 3 ملازمین کو نوکری سے نکال دیا گیا جبکہ ایک ملازم کو 20 ہزار روپے جرمانہ کیا گیا ہے۔
سپورٹس بورڈ پنجاب میں ایک خاتون ملازمہ نے کچھ ماہ قبل چند ملازمین کے خلاف ہراساں کرنے پر درخواست دی تھی جس پر محکمہ نے ڈائریکٹر ایڈمن کی سربراہی میں تین رکنی انکوائری کمیٹی تشکیل دی تھی۔
اس کمیٹی نے انکوائری کے بعد اپنی رپورٹ سیکرٹری سپورٹس کو دی، انکوائری کمیٹی کی تجاویز پر سیکرٹری سپورٹس نے دوباہ انکوائری کی جس کے بعد سیکرٹری سپورٹس نے ملازمین کو فارغ کرنے کا فیصلہ کیا۔
سپورٹس بورڈ پنجاب کا کہنا ہے کہ خاتون ملازمہ کی درخواست پر انکوائری کمیٹی تشکیل دی گئی تھی، ملازمین کو پہلے معطل کیا گیا اور ثبوتوں کی روشنی میں نوکری سے برخاست کیا گیا ہے۔
ملازم مبشر، احسان بھٹی اور محمد عزیر کو نوکری سے فارغ اور میاں شاہد کو 20 ہزار روپے جرمانہ کیا گیا۔
