اسلام آباد: (دنیا نیوز) وفاقی حکومت نے اسلام آباد کے 16 ڈگری کالجوں کو ہائی امپیکٹ آئی ٹی ٹریننگ انسٹیٹیوٹ میں تبدیل کر دیا۔
وزارت وفاقی تعلیم و پیشہ ورانہ تربیت، نیوٹیک اور پاکستان کی ٹاپ یونیورسٹیز نسٹ، نیومل، جی آئی کے، فاسٹ اور کامسیٹیس کے اشتراک سے آئی ٹی ٹریننگ کا آغاز کر دیا گیا۔
آرٹیفیشل انٹیلی جنس، ڈیٹا سائنس اور بلاک چین کے 3 سے 6 ماہ کے کورس شروع کر دیئے گئے ہیں۔
سیکرٹری وفاقی تعلیم و پیشہ ورانہ تربیت محی الدین احمد وانی نے اپنے بیان میں کہا کہ دنیا آرٹیفیشل انٹیلی جنس کی طرف بڑھ رہی ہے، ملک کی بہترین یونیورسٹیاں ان کالجوں میں طلباء کو جدید کورس کروائیں گی اور گریجویشن کرنے والے طلباء کو آئی ٹی ٹریننگ کورس کرائے جائیں گے۔
محی الدین احمد وانی کا کہنا تھا کہ آئی ٹی ٹریننگ کورس کرنیوالے طلباء کو ملازمتوں کے حصول میں آسانی ہوگی، ریاضی، کمپیوٹر سائنسز اور شماریات میں بی ایس کرنے والے طلباء کورس کر سکیں گے جبکہ یونیورسٹیوں میں بی ایس کے ساتویں سمسٹر کے طلباء بھی داخلہ لے سکتے ہیں۔
سیکرٹری وفاقی تعلیم و پیشہ ورانہ تربیت نے کہا کہ جی سکس سے ایف الیون تک تمام سیکٹرز کے کالجوں میں کورسز شروع کر دیئے، وقت گزر رہا ہے لہٰذا طلبہ و طالبات جلد آن لائن اپلائی کریں۔
