لاہور: (دنیا نیوز) لاہور ہائیکورٹ نے سوشل میڈیا ایپ ایکس (سابقہ ٹویٹر) کی بندش کیخلاف درخواست پر فریقین سے جواب طلب کرلیا۔
چیف جسٹس لاہور ہائیکورٹ جسٹس مس عالیہ نیلم کی سربراہی میں فل بنچ نے ایکس کی بندش کیخلاف درخواست پر سماعت کی۔
پاکستان ٹیلی کمیونی کیشن اتھارٹی کے وکیل نے درخواستوں کی مخالف کی جبکہ ڈپٹی اٹارنی جرنل نے عدالت کو بتایا کہ وزارت داخلہ کی ہدایات کی روشنی میں پاکستان ٹیلی کمیونی کیشن اتھارٹی نے ایکس کو بین کیا۔
عدالت نے وفاقی وزارت داخلہ سے ایکس کے استعمال کی بابت رپورٹ مانگ لی جبکہ پاکستان ٹیلی کمیونی کیشن اتھارٹی کی ورکنگ طلب کر لی اور پی ٹی اے کے ذمہ دار افسر کو بھی ریکارڈ سمت طلب کر لیا۔
جسٹس مس عالیہ نیلم نے کہا کہ یہ بھی بتایا جائے کہ پابندی کے باوجود کونسے حکومتی ادارے ایکس استعمال کر رہے ہیں ، یہ بھی بتایا جاے کہ ایکس کی حیثیت قانونی ہے یا غیر قانونی سارے فریقین عدالت میں جواب داخل کرانے کے پابند ہیں۔
چیف جسٹس نے ریمارکس میں کہا کہ وزارت داخلہ نے ایکس کی موجودہ صورت حال کے بارے آگاہ کرنا ہے جبکہ جسٹس علی ضیاء باجوہ نے کہا کہ اگر ایکس بلاک ہونے کے باوجود استعمال ہورہا ہے تو اس کا ذمہ دار کون ہے۔
بعدازاں لاہور ہائیکورٹ نے سوشل میڈیا ایپ ایکس پر پابندی کے خلاف درخواست پر مزید سماعت 20 مارچ تک ملتوی کردی۔
