کیلیفورنیا: (ویب ڈیسک) پیغام رسانی کیلئے استعمال ہونے والی دنیا کی سب سے مقبول ترین ایپلی کیشن واٹس ایپ میں چیٹس کے لئے بہترین فیچر کا اضافہ کر دیا۔
ویب بیٹا انفو کی رپورٹ کے مطابق میٹا کی زیر ملکیت میسیجنگ ایپ واٹس ایپ میں ایک فیچر کو متعارف کرایا جا رہا ہے جس میں صارفین میسیجز پر ریپلائی تھریڈ فارمیٹ میں کر سکیں گے۔
فیس بک یا ایکس کے صارفین کمنٹس پر ریپلائز کرتے ہوئے اسی فیچر کا استعمال کرتے ہیں، تاہم اب اس فیچر کو واٹس ایپ کا حصہ بنایا جارہا ہے تاکہ چیٹس کا تجربہ زیادہ آسان اور منظم ہوسکے۔
ابھی ہر میسیج پر کیا جانے والا ریپلائی الگ پوسٹ ہوتا ہے تو کئی بار پرانے ریپلائز کو تلاش کرنا مشکل ہوجاتا ہے، مگر اس فیچر کے تحت کسی گروپ چیٹ میں ریپلائیز ایک ہی جگہ اوریجنل میسج کے نیچے نظر آئیں گے جس سے گفتگو کا متن واضح ہوگا۔
واٹس ایپ کے نئے (بیٹا) ورژنز (اینڈرائیڈ اور آئی او ایس) میں اس فیچر کا عندیہ ملا ہے۔
رپورٹ میں بتایا گیا کہ اس فیچر کی بدولت صارفین کو پوری چیٹ ہسٹری میں کسی مخصوص میسیج پر کئے جانے والے ریپلائیز کو دیکھنے کیلئے پوری چیٹ ہسٹری میں سکرول کرنے کی ضرورت نہیں ہوگی۔
رپورٹ کے مطابق جب کوئی فرد کسی میسج پر ریپلائی کرے گا تو اوریجنل میسج پر ایک چھوٹا آئیکون نظر آئے گا، اس آئیکون پر کلک کرنے پر صارفین کے سامنے اس میسج پر کئے جانے والے تمام ریپلائیز آجائیں گے۔
صارفین اس میسیج تھریڈ کے اندر براہ راست نئے ریپلائز بھی بھیج سکیں گے تاکہ کسی موضوع سے متعلق بات چیت کو ایک ہی جگہ تک محدود رکھا جاسکے۔
یہ فیچر بھی گروپ چیٹس کیلئے مددگار ثابت ہوگا جہاں میسیجز کی تعداد بہت زیادہ ہوتی ہے اور انہیں ٹریک کرنا مشکل ہوتا ہے، ابھی یہ کہنا قبل ازوقت ہے کہ اس فیچر کو باقاعدہ طور پر کب متعارف کرایا جائے گا۔
