خلاصہ
- بیجنگ: (ویب ڈیسک) یوں تو پاکستان سمیت ایشیا بھر میں چاول کھانے کے بہت زیادہ لوگ شوقین ہیں، پاکستان، بھارت، بنگلا دیش سمیت پورے ایشیائی خطے میں چاولوں کی پیداوار بھی زبردست ہوتی ہے، تاہم چاولوں کے بارے میں ایک حیران کن خبر چین سے آئی ہے چین میں چاول کا ایک پیالہ 1405 امریکی ڈالر (تقریباً دو لاکھ پاکستانی روپے) کی خطیر رقم میں نیلام کیا گیا ہے۔
غیر ملکی خبر رساں ادارے کے مطابق شمالی چین میں واقع ایک گاؤں میں چاول کی پہلی فصل کی کٹائی کے بعد نئی فصل سے حاصل کیے جانے والے چاول کا پہلا پیالہ نیلام کیا جاتا ہے۔
خبر رساں ادارے کے مطابق گریٹ ناردرن وائلڈرنس نامی فارم جو شمالی چین کا زرعی اعتبار سے اہم خطہ ہے اور زرخیز زمین کی وجہ سے یہ کالی مٹی کے نام سے مشہور ہے۔ فارم میں چاول کی نئی فصل کی کٹائی کے بعد حاصل کیے جانے والے چاول میں سے پیالہ چاول نکال کر پکائےگئے جسے پکانے کے بعد نیلامی کے لیے پیش کیا گیا۔
.jpg)
نیلامی کے موقع پر بہت سے لوگوں نے شرکت کی اور نئی فصل کے چاول کے پہلے پیالے کے لیے خوب بولیاں لگائیں گئی مگر اسی دوران ایک خاتون نے سب سے زیادہ بولی لگا کر 1405 ڈالرز میں نئی فصل کے چاول کا پہلا پیالہ حاصل کرلیا۔
خاتون نے جب چاول کی نیلامی کی رقم ادا کردی تو ان کا کہنا تھا کہ اب وہ یہ چاول کھائیں گی اور انہیں بے حد خوشی ہوگی۔ اس نیلامی کے حوالے سے بہت سے شہریوں کا کہنا تھا کہ یہ پروگرام کسی بھی شخص کو دولت مند ثابت کرنے کا نہایت ہی کربناک طریقہ تھا۔
