آئیووا: (ویب ڈیسک) دنیا بھر میں سب سے لمبے قد کا اعزاز پانے والا کتا چار سال کی عمر میں چل بسا، کیون نامی گریٹ ڈین کو دنیا کے سب سے لمبے کتے کا تاج پہنایا گیا۔
رپورٹ کے مطابق کیون جو کہ ایک 4 سالہ گریٹ ڈین نسل سے تعلق رکھنے والا کتا ہے کو حال ہی میں گنیز بک آف ورلڈ ریکارڈز نے دنیا کا سب سے لمبا کتا قرار دیا تھا۔
گریٹ ڈین نسل سے تعلق رکھنے والے کتے بڑے قد و قامت کے باوجود بہت دوستانہ، وفادار اور نرم رویے کے حامل جانور ہیں۔
عام کتوں کی نسبت بہت زیادہ لمبا اور طاقتور دکھائی دینے والا یہ کتا لوگوں کو بہت بہادر اور خوفناک لگتا ہے لیکن حقیقت یہ ہے کہ وہ بہت حساس اور ڈرپوک ہے، وہ شور شرابے سے بہت ڈرتا ہے، اس کی مالکہ ٹریسی وولف کا کہنا ہے کہ ویکیوم کلینر کا شور بھی اسے پاگل کر دیتا ہے۔
ٹریسی وولف نے اپنے کتے کے بارے میں بتایا کہ اسے اپنے دوست بنانے میں مشکل ہوتی ہے کیونکہ دوسرے کتے اس کے قد سے خوفزدہ ہوجاتے ہیں۔
غیرملکی خبر رساں ادارے کی رپورٹ کے مطابق 4 سالہ گریٹ ڈین ’کیون‘ کی مالکہ ٹریسی وولف اپنے شوہر، دو بچوں، تین پالتو بلیوں، چار کتوں اور متعدد مرغیوں، بکریوں اور گھوڑوں کے ساتھ امریکی ریاست آئیووا کے ایک فارم پر رہائش پذیر ہے۔
ٹریسی وولف نے کہا کہ سال 2019 میں سوشل میڈیا پر ایک اشتہار میں کتے کے اس بچے کو اسے دیکھ کر خرید لیا، انہوں نے بتایا کہ میرے بچوں نے اس کتے کا نام شہرہ آفاق فلم ہوم الون کے مرکزی کردار کیون میک کالیسٹر کے نام پر رکھا تھا۔
کیون کا شروع ہی سے ٹریسی کے بیٹے الیگزینڈر کے ساتھ خاص تعلق تھا اور اسی کو گنیز ورلڈ ریکارڈ تک پہنچنے کا خیال بھی آیا، شروع کے دنوں میں کیون کے اتنا لمبا ہونے کے کوئی آثار نہیں تھے لیکن جب وہ ایک سال کا ہوا تو ہم پر یہ بات واضح ہوچکی تھی کہ یہ کتا غیرمعمولی طور پر لمبا ہوگا، کیون صرف بڑھا ہی نہیں بلکہ بڑھتا ہی چلا گیا۔
ٹریسی وولف نے بتایا کہ اس نسل کے کتوں کا اوسط قد تقریباً 2 فٹ، 6 انچ (76,2 سینٹی میٹر) تک ہوتا ہے جبکہ کیون کا قد 3 فٹ اور 2 انچ (96,52 سینٹی میٹر) کا تھا، اس کی معصومیت کا یہ عالم تھا کہ بلی کے بچوں سے بھی ڈر جاتا تھا ذرا سی بات پر بے چین اور گھبرا جایا کرتا تھا۔
انہوں نے افسردگی کے عالم میں بتایا کہ بدقسمتی سے کیون معدے کی ہنگامی سرجری کی وجہ سے پیدا ہونے والی پیچیدگیوں کے باعث چل بسا۔
