کیپ ٹاؤن:(ویب ڈیسک ) سننے کی صلاحیت سے محروم ماڈل نے’مس جنوبی افریقہ‘ کا تاج اپنے نام کر کے تاریخ رقم کردی ۔
28 سالہ ماڈل اور مارکیٹنگ مینجر میا لی روکس نے’مس جنوبی افریقہ ‘کا تاج پہنتے ہوئے کہا کہ میں امید کرتی ہوں کہ میری یہ کامیابی ان تمام لوگوں کی حوصلہ افزائی کرے گی جو خود کو باقی دنیا سے الگ تھلگ محسوس کرتے ہیں۔
اُنہوں نے کہا کہ میں اپنے جیسے تمام لوگوں کو اپنے ناممکن خوابوں کو پورا کرنے کی ترغیب دوں گی، میں فخر کے ساتھ کہتی ہوں کہ میں ایک سماعت سے محروم افریقی خاتون ہوں جو تنہائی کے درد کو اچھی طرح سمجھتی ہے۔
برطانوی میڈیاکی رپورٹ میں بتایا گیا کہ جب میا لی روکس صرف ایک سال کی تھیں تو ڈاکٹرز نے ان کی سماعت میں شدید کمی دیکھی اور سرجری کے ذریعے ان کے سر میں کوکلیئر ہیئرنگ ایڈ لگا دی تاکہ وہ سن سکیں،اس سرجری کے بعد ان کی دو سال کی ایک سپیچ تھراپی کروائی گئی اور پھر وہ بولنے کے قابل ہوئیں۔
رپورٹ میں بتایا گیا ہے کہ مقابلہ حسن میں میا لی روکس کو فائنلسٹ 23 سالہ قانون کی طالبہ چڈیما اڈیٹسینا اور اپنے نائیجیرین نژاد ہونے کے حوالے سے تنقید کا سامنا کرنا پڑا۔
قابل ذکر بات یہ ہے کہ چڈیما اڈیٹسینا جنوبی افریقہ میں ایک نائیجیرین والد اور ایک جنوبی افریقی ماں کے ہاں پیدا ہوئی تھیں لیکن یہ فیملی موزمبیق سے جنوبی افریقہ آئی تھی۔
دوسری جانب اس تنازع نے سوشل میڈیا پر تہلکہ مچا دیا اور صارفین کی جانب سے یہ سوال اُٹھایا گیا کہ ایک موزمبیقی لڑکی جنوبی افریقہ کی نمائندگی کیسے کر سکتی ہے، معاملہ زیادہ سنجیدہ ہوجانے کے بعد چڈیما اڈیٹسینا مقابلے سے دستبردار ہوگئیں۔
