واشنگٹن: (دنیا نیوز) امریکی صدر بائیڈن نے روسی ہم منصب صدر پیوٹن کو ٹھگ قرار دے دیا، اس سے قبل جوبائیڈن نے پیوٹن کو جنگی مجرم بھی کہا تھا جس کو روس نے ناقابل معافی بیان قرار دیا تھا۔
کیپٹل ہل میں خطاب کرتے ہوئے صدر بائیڈن نے روسی صدر پرکڑی تنقید کی، انہوں نے کہا کہ پیوٹن ایک قاتل ڈکٹیٹر اور ٹھگ ہیں۔ انہوں نے یوکرین کے لوگوں پر غیراخلاقی جنگ مسلط کی، صدرپیوٹن اور ان کی فوج جوکچھ یوکرین میں کر رہی ہے وہ مکمل طور پر غیر انسانی ہے۔
واضح رہے کہ صدر بائیڈن روسی صدر کو جنگی مجرم بھی قراردے چکے ہیں۔ روس کی جانب سے امریکی صدر کے بیان کی سخت مذمت کی گئی اور بیان کو ناقابل قبول اور ناقابل معافی قرار دیا گیا، روسی صدر کے ترجمان دمتری پیسکوو کا کہنا تھا کہ کسی بھی سربراہ مملکت کی جانب سے ایسا بیان کسی طور قابل معافی نہیں، دنیا کے مختلف ممالک میں امریکی حملوں کے نتیجے میں ہزاروں افراد ہلاک ہو چکے ہیں۔
