نئی دہلی: (ویب ڈیسک) بھارت کے وزیر اعظم نریندر مودی کو 'پنوتی' کہنے پر بھارتی الیکشن کمیشن نے کانگریس کے رہنما راہول گاندھی کو نوٹس جاری کرتے ہوئے جواب طلب کر لیا۔
بھارتی میڈیا کے مطابق الیکشن کمیشن نے جمعرات کو کانگریس لیڈر راہول گاندھی کو وزیر اعظم نریندر مودی کو پنوتی (منحوس) اور جیب کترا کہنے پر نوٹس جاری کیا ہے۔
الیکشن کمیشن کے نوٹس میں کہا گیا ہے وزیر اعظم کو جیب کترا کہنا اور ان کے خلاف لفظ پنوتی کا استعمال کرنا سیاسی پارٹی کے ایک بہت ہی سینیئر لیڈر کے لیے غیر مناسب ہے۔
الیکشن کمیشن نے راہول گاندھی کو نوٹس جاری کرتے ہوئے کہا ہے کہ وہ ہفتہ کی شام 6 بجے تک جواب جمع کروائیں اور وضاحت پیش کریں کہ ان کے خلاف انتخابی ضابطہ اخلاق کی خلاف ورزی پر کارروائی کیوں نہ کی جائے۔
— Ashish Singh (@AshishSinghKiJi) November 21, 2023
بھارتی میڈیا کے مطابق منگل کو راجستھان میں ایک انتخابی ریلی سے خطاب کرتے ہوئے راہول گاندھی نے نریندر مودی پر طنز کیا اور کہا کہ اچھے بھلے ہمارے لڑکے وہاں پر ورلڈ کپ جیت جاتے لیکن پنوتی نے ہروا دیا ۔
دوسری جانب بی جے پی نے راہول گاندھی کے وزیراعظم نریندر مودی سے متعلق بیان کی مذمت کرتے ہوئے ان پر شدید تنقید کی اور ان کے خلاف شکایت درج کروائی تھی۔
