ممبئی: (ویب ڈیسک) بھارتی وزیراعظم نریندرا مودی کے بیرون ملک روانگی سے قبل طیارے کو بم دھماکے سے اُڑانے کی دھمکی پر سکیورٹی پر مامور افسران کی دوڑیں لگ گئیں۔
بھارتی میڈیا کے مطابق دھمکی آمیز فون کال ممبئی پولیس کو موصول ہوئی تھی جس میں کہا گیا تھا کہ امریکی دہشت گرد مودی کے طیارے کو دھماکے میں اُڑا دیں گے، کال کرنے والے نے مزید کہا تھا کہ یہ وہی دہشت گرد گروہ ہے جس نے 6 ماہ قبل امریکا میں طیارے کو نشانہ بنایا تھا جس میں 6 افراد مارے گئے تھے۔
میڈیا رپورٹ میں بتایا گیا ہے کہ دھمکی دینے والے شخص نے کہا کہ اسی گروپ نے طیارے میں بم رکھ دیا ہے اور اب مودی کو مرنے سے کوئی نہیں بچا سکتا، دھمکی آمیز فون موصول ہونے پر ممبئی پولیس نے سکیورٹی ایجنسیز کو مطلع کیا اور سکیورٹی کلیئرنس تک طیارے کو پرواز سے روکا رکھا گیا۔
بعد ازاں طیارے سے کچھ برآمد نہ ہونے پر پرواز کے لئے کلیئرنس دیدی گئی، کالر نے اپنا فون بند کردیا جس کے باعث اس کی تلاش میں دشواری کا سامنا کرنا پڑا، تفتیش کے دوران پتا چلا کہ اس نمبر سے ماضی میں بھی پولیس کو 1400 سے زائد کالیں موصول ہوئی تھیں۔
بعد ازاں پولیس ملزم کو گرفتار کرنے میں کامیاب ہوگئی جس کا ذہنی توازن درست نہیں ہے تاہم تفتیشی عمل مکمل ہونے تک اسے حراست میں رکھا جائے گا۔
