سری نگر: (دنیا نیوز) پہلگام فالز فلیگ آپریشن کے بعد مقبوضہ کشمیرمیں بھارتی فوج کے مظالم جاری، بھارتی فوج نے پلوامہ میں کشمیریوں کے گھروں کو تباہ کر دیا۔
بھارتی فوج نے پلوامہ میں بے گناہ کشمیریوں کے گھر کو بارودی مواد سے اڑا دیا، متاثرہ خاندان کی خاتون کا کہنا تھا کہ میرے بھائی کی شادی 10 دن میں ہونے والی تھی، دنیا اس تباہی کو دیکھے جس کا ہم (کشمیری) سامنا کر رہے ہیں۔
متاثرہ کشمیری خاتون نے کہا کہ ہمارے گھروں کو ایسے تباہ کیا گیا جیسے اسرائیلی فوج فلسطین میں کر رہی ہے، تباہ کئے جانے والے گھر کے بزرگ کا کہنا تھا کہ شام 7 بجے بھارتی فوج آئی اور ہمیں گھر سے جانے کو کہا۔
انہوں نے کہا کہ بھارتی فوج ہمیں مسجد کے اندر لے گئی اور رات 10 بجے تک وہاں رکھا، بھارتی فوج نے ہمارے گھر کو دھماکے سے تباہ کر دیا۔
متاثرہ کشمیری بزرگ نے کہا کہ ہمیں آدھی رات کو چھوڑا گیا ،ہم گھر لوٹے تو گھر کھنڈر میں تبدیل ہو چکا تھا، ہم بے گناہوں پر بھارتی فوج کا یہ ظلم ہے۔
محلے کی ایک خاتون کا کہنا تھا کہ اس علاقے میں زلزلہ کی طرح محسوس ہوا، ہمارے بچے بے ہوش ہوگئے اور اس کی وجہ سے 15 مکانات بھی متاثر ہوئے اور بھاری نقصان پہنچا۔
قریبی رہائشی کشمیری مرد نے کہا کہ جس کا گھر تباہ کر دیا گیا اب وہ کیا کریں گے، کون مدد کرے گا، کشمیری پڑوسی بھی مدد نہیں کر یں گے کیونکہ ہر ایک خوف میں مبتلا ہے۔
بھارتی فوج ہر فالز فلیگ آپریشن کے بعد بے گناہ کشمیری مسلمانوں پر مظالم کا جواز ڈھونڈ لیتی ہے، بھارتی فوج مقبوضہ کشمیر کے بے گناہ مسلمانوں پر اسرائیلی طرز پر مظالم ڈھا رہی ہے، مودی کو کشمیر چاہئے کشمیری نہیں، یہی بی جے پی کا خفیہ ایجنڈا ہے۔
