نئی دہلی : (ویب ڈیسک) بھارت نے ترکیہ کی جانب سے پاکستان کی حمایت کرنے پر ترک ایئرپورٹ سروس کمپنی کی سکیورٹی کلیئرنس فوری طور پر منسوخ کر دی۔
بھارتی وزارتِ شہری ہوابازی کے مطابق یہ اقدام قومی سلامتی کے خدشات کی بنیاد پر کیا گیا، بھارت میں لوگ ترکی اور آذربائیجان کی سیر کا پروگرام منسوخ کر رہے ہیں کیونکہ ان ممالک نے حالیہ پاک بھارت تنازع میں پاکستان کی حمایت کی تھی۔
دہلی انٹرنیشنل ایئرپورٹ کے حکام کا کہنا ہے کہ انہوں نے سیلیبی ایئرپورٹ سروسز انڈیا سے علیحدگی کے بعد اب AISATS اور Brid Group کے ساتھ کام شروع کر دیا ہے۔
بھارتی ڈپٹی وزیرِ شہری ہوابازی مرلی دھر موہول نے کہا کہ پورے ملک سے سیلیبی پر پابندی کی درخواستیں موصول ہو رہی تھیں۔
سیلیبی ایئرپورٹ سروسز بھارت کے نو بڑے ہوائی اڈوں پر گرائونڈ ہینڈلنگ کی خدمات فراہم کرتی ہے، اس نے بھارتی حکومت کے فیصلے پر فی الحال کوئی تبصرہ نہیں کیا۔
